მდინარის ახალი კალაპოტი ბოსტანში – მოსახლეობა დახმარებას ითხოვს

მდინარე აჭარისწყალმა დასახლებული პუნქტიდან რამდენიმე მეტრით მოშორებით ახალი კალაპოტი რამდენიმე კვირის წინ გაჭრა. იქ სადაც მოსახლეობას ბოსტნეული მოჰყავდა ახლა მდინარის კალაპოტია  და წვიმის დროს ადიდებული მდინარის ნაწილი ამ კალაპოტში ინაცვლებს.  მოსახლეობა შიშობს, რომ თუ დროულად არ გაკეთდება დამცავი ჯებირი, საცხოვრებელ სახლებს საშიშროება შეექმნება.  

„აქ ოთხი ოჯახი ვცხოვრობთ. წყალდიდობისას საკარმიდამოები იტბორება. წელს პირველად გადმოვიდა მდინარე და ბოსტნები დატბორა, ჩამოიტანა ქვა-ღორღი. იქ სადაც ახლა მდინარე მიედინება, ბოსტნეული მოგვყავდა.  წელს მოსავლის აღებაც კი ვერ მოვასწარით, მდინარე გადმოვიდა და ყველაფერი წაიღო, ხელისუფლებას დახმარებას ვთხოვთ, აუცილებელია დამცავი ჯებირის გაკეთება, თუ დროულად არ გაკეთდა, მდინარე უფრო მეტ ნაკვეთს წაიღებს და საცხოვრებელ სახლებსაც საშიშროება შეექმნება“ – ამბობს ენვერ საფარიძე.