„რვაფეხას“ მდგომარეობის შესახებ დასკვნა სამხარაულის ექსპერტიზის ბიურომ მოამზადა. დასკვნაში აღნიშნულია, რომ „რვაფეხას“ არსებული მდგომარეობით ექსპლუატაცია შეუძლებელია, რასაც „ბათომის“ წევრებიც ეთანხმებიან და მთავრობისგან შემდეგ ნაბიჯს, ძეგლის რეაბილიტაციასა და რესტავრაციას ითხოვენ.
„ეს დასკვნა იყო აუცილებელი და მადლობა, რომ ეს გააკეთეთ, თუმცა იგივე დასკვნა იყო ვიზუალური დათვალიერების შედეგადაც ცნობილი. ახლა უკვე უნდა ჩაერთონ არქიტექტორ-რესტავრატორები, მათ უნდა მოამზადონ დასკვნა, თუ რა და როგორ შეიძლება გაკეთდეს“ – განაცხადა საზოგადოება „ბათომის“ ხელმძღვანელმა, არქეოლოგმა ნინო ინაიშვილმა შეხვედრაზე.
„ამ დასკვნის საფუძველზე ჩვენ უნდა გავარკვიოთ, შესაძლებლად მიიჩნევს თუ არა არქიტექტორ-რესტავრატორი ძეგლის ისე გამაგრებას, რომ შენარჩუნებული იყოს მისი კულტურული ღირებულება და სანდოობა“ – აღნიშნა პარმენ ჯალაღონიამ, აჭარის მთავრობის წარმომადგენელმა, რომელიც შეხვდა დღეს არასამთავრობო ორგანიზაციის წარმომადგენლებს.
„ბათომის“ წევრებმა მთავრობას შესთავაზეს კულტურული მემკვიდრეობის სააგენტოსა და საერთაშორისო ექსპერტების ჩართვა „რვაფეხას“ სარესტავრაციო დოკუმენტების მომზადებაში.
პარმენ ჯალაღონიამ განაცხადა, რომ უახლოეს დღეებში მთავრობა მიმართავს კულტურული მემკვიდრეობის დაცვის სააგენტოს თხოვნით, „რვაფეხას“ რესტავრაციასთან დაკავშირებულ საკითხებში ჩაერთონ არქიტექტორ-რესტავრატორები.
