დააბრუნეთ თუ არა პრემია? – ეს კითხვა „ბათუმელებმა“ ბათუმის საკრებულოს თავმჯდომარის მოადგილეს, ირაკლი მიქელაძეს დაუსვა. ირაკლი მიქელაძემ კითხვას არ უპასუხა და თქვა: „ბრიფინგს გავაკეთებ ორ დღეში და ყველას ერთად გიპასუხებთ“. ანალოგიური კითხვა „ბათუმელებმა“ გასულ კვირასაც დასვა – საკრებულოს თავმჯდომარის მოადგილემ მაშინაც თქვა, რომ ორ დღეში ბრიფინგს გამართავდა და ისე გასცემდა „ამ კითხვას პასუხს“.
ირაკლი მიქელაძეს მაშინ ბრიფინგი არ გაუმართავს.
საქმე იმაშია, რომ ბათუმის საკრებულოს თავმჯდომარის მოადგილე მას შემდეგ, რაც საკრებულოს თავმჯდომრის მოადგილე გახდა [მიქელაძე ბათუმის საკრებულოს თავმჯდომარის მოადგილედ 2016 წლის 29 დეკემბერს აირჩიეს. დაწინაურების შემდეგ თავმჯდომარის მოადგილე მხოლოდ ერთ სხდომას დაესწრო – 2017 წლის 18 იანვარს.], მალევე გერმანიაში გაემგზავრა. ამის მიუხედავად, ირაკლი მიქელაძეს მიღებული აქვს როგორც პრემია, ისე ხელფასი, ტელეფონის და ავტომანქანის საწვავის ხარჯები.
ირაკლი მიქელაძე საქართველოში დაახლოებით ორი კვირის წინ დაბრუნდა.
თანამდებობის პირისთვის, რომელიც სამსახურში არ დადიოდა, ბათუმის ბიუჯეტიდან მხოლოდ 2017 წლის პირველ ოთხ თვეში 16 450 ლარი დაიხარჯა. ამას ბათუმის საკრებულოდან გამოგზავნილი ოფიციალური ინფორმაცია ადასტურებს, რომელსაც ხელს საკრებულოს მთავარი ბუღალტერი გ. კვერღელიძე აწერს.
31 მაისის საკრებულოს სხდომაზე საკრებულოს თავმჯდომარემ, ლაშა სირაბიძემ, აჭარის ტელევიზიასთან განაცხადა, რომ „სავარაუდოდ ბატონი ირაკლი უკან დააბრუნებს იმ კონკრეტულ პრემიას“.
