ბათუმის საკრებულო „აჭარა ფეშენ ვიკისა “ და მის და მისტერ პლანეტას“ დაფინანსების საკითხის განხილვას ხვალ, საკრებულოს რიგგარეშე სხდომაზე გეგმავს.
„ბათუმელების“ ინფორმაციით, საკრებულოს უმრავლესობა გეგმავს მხარი დაუჭიროს გასართობი ღონისძიებების ბიუჯეტიდან დაფინანსებას.
ღონიძიებებისთვის ბიუჯეტში ჯამში 91 000 ლარი გაითვალისწინეს.
ამ საკითხზე საკრებულომ ერთხელ უკვე იმსჯელა, თუმცა გადაწყვეტილება არ მიუღია. საკრებულოს წევრებმა საკითხის კენჭისყრამდე ღონისძიებების ორგანიზატორებისგან ინფორმაციის მიღების სურვილი გამოთქვეს.
ორგანიზატორების მოსმენის შემდეგ კი მერიამ საკითხი ბიუჯეტის ცვლილებების პროექტში ისევ გაითვალისწინა.
„აჭარა ფეშენ ვიქს“ ორგანიზებას „მოდისა და დიზაინის ასოციაცია“ უწევს. მისი დამფუძნებელი მანანა გოგლიჩიძეა, რომელიც სამოდელო ბიზნესის გარდა ქუთაისში მდებარე სასტუმრო “ბაგრატი 1003”-ის მფლობელია.
ღონისძიების ორგანიზატორები ფიქრობენ, რომ აჭარა ფეშენ ვიკისა “ და მის და მისტერ პლანეტას“ ბათუმში გამართვა ტურისტების მოზიდვას შეუწყობს ხელს.
„მის და მისტერ პლანეტას“ ორგანიზატორი ქუთაისში რეგისტრირებული კომპანია შპს „მის პლანეტა საქართველოა“, რომლის 100%-იანი წილის მფლობელი ეკატერინე მგალობლიშვილია. მგალობლიშვილი სამოდელო სააგენტოს “კატრინის” მფლობელიცაა. ამ სააგენტოს გასულ წლებში რამდენიმე სკანდალი უკავშირდება. მათ შორის 2014 წლის თბილისობის დღესასწაულზე მომხდარი ფაქტი. კერძოდ, მაშინდელმა სამგორის რაიონის გამგებელმა, მამუკა ჩოქურმა თბილისობაზე გამოყოფილი 15 250 ლარი, ტენდერის გამოცხადების გარეშე, თავისი მეუღლის, ეკატერინე მგალობლიშვილის მეგობრის კომპანიის ანგარიშზე ჩარიცხა. საქმეს პროკურატურა სწავლობდა.
ამავე თემაზე: რას ფიქრობენ ბათუმში „მის და მისტერ პლანეტას“ ბიუჯეტიდან დაფინანსებაზე
