სარეკლამო და პიარკამპანიებისთვის აჭარის ტურიზმის დეპარტამენტი ბიუჯეტის გაზრდას 929 700 ლარით აპირებს [+18 პროცენტი]. რეკლამისთვის გათვალისწინებული ბიუჯეტი წელს 6 094 700 ლარია.
დეპარტამენტი რეკლამისთვის გათვალისწინებული დაფინანსების დახარჯვას ძირითადად 16 სამიზნე ქვეყანაში აპირებს. დეპარტამენტის ოფიციალურ ვებგვერდზე გამოქვეყნებული ინფორმაციის მიხედვით, გარე რეკლამისთვის 5 594 700 ლარი დაიხარჯება, შიდა რეკლამისთვის კი, მხოლოდ ნახევარი მილიონი. ტურიზმის დეპარტამენტი ონლაინრეკლამის გაძლიერებას გეგმავს.
აჭარის ტურიზმის დეპარტამენტის 2018 წლის ბიუჯეტის პროექტის მიხედვით, ჯამში დეპარტამენტის დაფინანსება შესაძლოა 15 პროცენტით, მილიონ 116 ათასი ლარით გაიზარდოს. 2017 წელს ტურიზმის დეპარტამენტის ბიუჯეტი 7 441 800 ლარს შეადგენს.
