ტელეკომპანია „თრიალეთის“ ეთერში, გორის მცხოვრებლები ბათუმში, 11 მარტს განვითარებულ მოვლენებს აფასებენ და მიიჩნევენ, რომ აჭარის საპატრულო პოლიციის უფროსი კახა ბუხრაძე და მისი ჯგუფი გორშიც სიმკაცრით გამოირჩეოდა.
მოქალაქე: „ გორში რომ პატრულია, მაგაზე ცუდი პატრული არ არსებობს, უმიზეზოდ აჯარიმებენ ადამიანებს და აჯარიმებენ“.
მოქალაქე: „მე მგონია, რომ ჩვენგან ჩასული პოლიციელების ბრალია, ადრეც იყო წინა ხელისუფლების დროსაც, რომ აჭარლები რაღაც ცუდი ეპითეტებით მოიხსენიეს და როცა ვიღაცას დასჭირდება, ეს თემა წამოიწევს ხოლმე, რაც ძალიან ცუდია“.
მოქალაქე: „რაღაც პერიოდში იყო, რომ შედარებით აგრესიულები იყვნენ პოლიციელები, ვიდრე სხვა დროს. ამ ბოლო პერიოდში ასე აღარ ხდება“.
რევაზ რევაზიშვილი, საიას იურისტი – ხშირ შემთხვევაში საპატრულო პოლიციის თანამშრომლები არ იღებენ დასაბუთებულ გადაწყვეტილებებს პირის დაჯარიმებასთან დაკავშირებით. ამაზე ჩვენთან, საიაშიც არის მაღალი მომართვიანობა. არის შემთხვევები, როცა რაიონული სასამართლო აუქმებს ხოლმე პირის დაჯარიმების შესახებ გადაწყვეტილებას და არის შემთხვევები, როცა ეს ასე არ ხდება. თუმცა, პრობლემა ნათელია და საპატრულო პოლიციის თანამშრომლები სათანადოდ ვერ აფესებენ სიტუაციას, რაც საზოგადოებაში ქმნის აღქმას, რომ პოლიციის თანამშრომლები უკანონოდ მოქმედებენ“.
ლექსო ვალიაური – „რესპუბლიკური პარტია“: ბუხრაძე არ არის გორელი, თუმცა ეს არაფერს არ ცვლის. ეს ადამიანები, რომლებიც გორში მუშაობდნენ, ჰქონდათ განცდა, რომ აჭარაშიც იმავე მეთოდებით იმუშავებდნენ. თუმცა, ადამიანების აქტიურობამ აჩვენა, რომ მსგავსი მეთოდები, მსგავსი ტიპის ადამიანის უფლებების დარღვევები, როგორზეც არის საუბარი, არ გაჭრის ყველა შემთხვევაში, რომ ყველაზე მნიშვნელოვანი არის ადამიანი“.
მედეა აბაშიძე – ეს ჯგუფი (საუბარია ბუხრაძეზე -ავტ.) სწორედ ამით გამოირჩევა (აგრესიით), ეს ძალიან კარგად ვიცით გორელებმა და ეს სიახლე ნაკლებად იქნებოდა ჩვენთვის. კანონი იძლევა იმის საშუალებას, რომ კანონის აღსრულება უკიდურესი ზომიდან არ დაიწყოს საპატრულო პოლიციამ. მიეცათ ადამიანისთვის გაფრთხილება, მსუბუქი ჯარიმა“.
