მოსამართლე ლევან გელოვანი ლაშა დეკანაძის საქმეს განიხილავს. ლაშა დეკანაძე 12 მარტის დილას დააკავეს ცნიბილი საპროტესტო აქციის შემდეგ, თავდაპირველად ადმინისტრაციული დარღვევისთვის, მოგვიანებით მას სისხლის სამართლის წესით წაუყენეს ბრალი.
ლაშა დეკანაძე ერთადერთია, ვინც „ბათუმის აქციის საქმეზე“ მასობრივი ძალადობის აღიარებაზე უარს ამბობს.
დღევანდელ პროცესზე დაცვის მხარემ იმ სასამართლო სხდომის აუდიო ჩანაწერი წარმოადგინა, სადაც ლაშა დეკანაძეს ადმინისტრაციული სამართალდარღვევა დადგინდა. წვრილმანი ხულიგნობის და პოლიციელების კანონიერი მოთხოვნების დაუმორჩილებლობის გამო, ლაშა დეკანაძეს მოსამართლე სალიხ შაინიძემ 5 დღით ადმინისტრაციული პატიმრობა შეუფარდა. სწორედ ამ პატიმრობის მოხდის შემდეგ წაუყენა ბრალი პროკურატურამ ლაშა დეკანაძეს სისხლის სამართლის წესით იგივე „ბათუმის აქციის საქმეზე“.
„ერთი და იგივე ქმედება სამართლებრივად ვერ იქნება ადმინისტრაციული დარღვევა და ამავდროულად სისხლის სამართლის დანაშაული,“ – აღნიშნავს ადვოკატი დავით ჯაფარიძე.
ადმინისტრაციულ პროცესზე პოლიციელებმა მოსამართლე სალიხ შაინიძეს უთხრეს, რომ ლაშა დეკანაძე საზოგადოებრივ წესრიგს არღვევდა, იგინებოდა პოლიციელების მისამართით და არ ემორჩილებოდა სამართალდამცველების მოთხოვნებს.
ამ პროცესზე, სადაც ლაშა დეკანაძეს ადმინისტრაციული პატიმრობის მოხდა შეუფარდეს, პოლიციელებს არაფერი უთქვამთ ლაშა დეკანაძის მხრიდან დანაშაულის ჩადენაზე, ანუ მასობრივ ძალადობაზე, რასაც ახლა ედავება პროკურატურა ბრალდებულს.
ადვოკატი დავით ჯაფარიძე ყურადღებას ამახვილებს მოწმე პოლიციელებზეც, რომლებიც სალიხ შაინიძესთან გამართულ პროცესზე საუბრობენ საზოგადობერივი წესრიგის დარღვევაზე და არა მასობრივ ძალადობაზე.
შემდეგ სხდომაზე მოსამართლე ერთ-ერთი ტელეკომპანიის ოპერატორის ჩვენებას მოისმენს, ვინც 11 მარტის აქციას აშუქებდა. ოპერატორს მოწმის სახით დაცვის მხარე წარმოადგენს.
დაცვის მხარის მტკიცებულებების გამოკვლევის დასრულების შემდეგ მოსამართლე ლევან გელოვანმა გადაწყვეტილება უნდა მიიღოს. თუკი მასობრივი ძალადობა დაუდასტურდება ლაშა დეკანაძეს, მას 4-დან 7-წლამდე თავისუფლების აღკვეთა ელის.
„ბათუმის აქციის საქმეზე“ სამართალდამცველებმა სულ 21 პირი დააკავეს, აქედან 18-ს, ბრალის აღიარების შემდეგ, საპროცესო შეთანხმება გაუფორმეს. ისინი მასობრივი ძალადობისთვის გაასამართლეს.
ამავე საქმეზე ბრალდებულია კიდევ ორი პირი: მერაბ ღოღობერიძე და ირაკლი ჩხვირკვია. მათ მასობრივი ძალადობის ორგანიზებას ედავება გამოძიება.
