საქართველოში ევროკავშირის ელჩმა, პაველ ჰერჩინსკიმ, წუხელ სპეცრაზმის მიერ მშვიდობიანი საპროტესტო აქციის ძალადობრივი დაშლის შემდეგ მედიასთან კომენტარი გააკეთა.
პაველ ჰერჩინსკი:
„მახსოვს, ორი წლის წინ, როდესაც საქართველოში ჩამოვედი, ჩემმა უფროსმა, ევროკომისიის პრეზიდენტმა, ურსულა ფონ დერ ლაიენმა, საჯაროდ განაცხადა: „საქართველო ევროკავშირს ეკუთვნის. ევროკავშირი არ იქნება სრულყოფილი საქართველოს გარეშე“.
ეს სიტყვები წარმართავდა ჩვენს მუშაობას ბოლო ორი წლის განმავლობაში. ეს სიტყვები წარმართავდა ჩემს მუშაობას აქ, როგორც ევროკავშირის ელჩის, ორი წლის განმავლობაში. მე ძალიან ამაყი ვიყავი, რომ ევროკავშირმა გადავწყვიტეთ საქართველოსთვის ჩვენი კარის გაღება.
ჩვენ საქართველოს მივანიჭეთ ევროკავშირის წევრობის კანდიდატი ქვეყნის სტატუსი და რაც გუშინ მოხდა, აშკარად ეწინააღმდეგება საქართველოს წინა მთავრობის პოლიტიკას, ფაქტობრივად, საქართველოს ყველა წინა მთავრობის პოლიტიკას, როგორც მე მესმის და ეს ასევე ეწინააღმდეგება ქართველების სრული უმრავლესობის ნებას.
მაგრამ, რა თქმა უნდა, საქართველო დამოუკიდებელი ქვეყანაა. საქართველო სუვერენული ქვეყანაა და საქართველოს გადასაწყვეტია, სურს თუ არა ევროინტეგრაციის გაგრძელება. ჩემი თვალსაზრისით, ეს ძალიან სამწუხაროა, ძალიან დასანანია და გულსატკენია“.
___
გუშინ პარტია „ქართულმა ოცნებამ“ განაცხადა, რომ აჩერებს ევროკავშირთან მოლაპარაკებას 2028 წლამდე, რაც თბილისში ატასობით ადამიანმა გააპროტესტა. დემონსტრანტებს სასტიკად გაუსწორდა სპეცრაზმი და პოლიცია.
სხვადასხვა დაზიანება აქვს მიყენებული 20-ზე მეტი ჟურნალისტს. სხვა დაშავებულების შესახებ ზუსტი მონაცემი ჯერჯერობით არ არსებობს. დაკავებულია 43 ადამიანი.
