დღეს აჭარის უმაღლესი საბჭოს ბიუროს სხდომაზე აზრთა სხვადასხვაობა გამოიწვია უმაღლესი საბჭოს წევრის პეტრე ზამბახიძის მიერ წარდგენილმა პროექტმა „საქართველოს საკონსტიტუციო სასამართლოში კონსტიტუციური სარჩელის შეტანის თაობაზე“. პროექტს ხელს აწერს უმაღლესი საბჭოს 5 წევრი.
უმაღლესი საბჭოს დეპუტატი საქართველოს პრეზიდენტის 2016 წლის 1 ივლისის განკარგულების გაბათილებას ითხოვს. ამ განკარგულებით პრეზიდენტმა აჭარის მთავრობა გადააყენა და იმავდროულად დანიშნა პრზიდენტის რწმუნებული აჭარაში.
დეპუტატი მიიჩნევს, რომ ამ გადაწყვეტილებით უხეშად დაირღვა საქართველოს საკონსტიტუციო კანონი „აჭარის სტატუსის შესახებ“.
საკითხის ინიციატორებმა პროექტს თან დაურთეს შესაბამისი საკონსტიტუციო სარჩელიც, რომელიც აღნიშნული საკითხის კანონიერების დადგენას ისახავს მიზნად.
აღნიშნული საკითხი ბიუროზე განხილულად და მომზადებულად ჩაითვალა. იქნება თუ არა აღნიშნული საკითხი იმ რიგგარეშე სხდომის დღის წესრიგში, რომელსაც უმაღლესი საბჭოს თავმჯდომარე მოიწვევს, უცნობია. თუ არ იქნება, მაშინ რიგგარეშე სხდომის მოწვევა აღნიშნულ საკითხზე 7 დეპუტატს შეუძლია, რისი რესურსიც ოპოზიციას უმაღლეს საბჭოში აქვს.
