ნეტგაზეთი • RU

პეტრე ზამბახიძე: სახელმწიფო რწმუნებულის დანიშვნა კონსტიტუციური კანონის დარღვევა იყო

აჭარის უმაღლესი საბჭოს წევრის „ერთიანი ნაციონალური მოძრაობიდან“ პეტრე ზამბახიძის განცხადებით,  აჭარის უმაღლესი საბჭოს 5–მა  წევრმა დღეს, 2 აგვისტოს, აჭარის უმაღლეს საბჭოში  წერილობითი მოთხოვნა შეიტანა, რათა უახლოეს სხდომაზე მიიღონ დადგენილება საკონსტიტუციო სასამართლოში კონსტიტუციური სარჩელის შეტანის  თაობაზე.  ზამბახიძის თქმით, ისინი ასაჩივრებენ საქართველოს პრეზიდენტის განკარგულებას აჭარის მთავრობის გადაყენებისა და აჭარაში სახელმწიფო რწმუნებულისა და მისი ადმინისტრაციის დანიშნვის შესახებ.

„ეს ნიშნავს იმას, რომ აჭარის სტატუსის შესახებ  კონსტიტუციური კანონი არის დარღვეული.  პრეზიდენტს არ ჰქონდა უფლებამოსილება, თავის განკარგულებაში მოყვანილი საბაბით მიეღო გადაწყვეტილება და დაენიშნა საკუთარი რწმუნებული. ჩვენ გავიარეთ  თბილისში ექსპერტებთან  და არასამთავრობო ორგანიზაციებთან კონსულტაციები და საერთო პოზიცია ჩამოვაყალიბეთ იმის შესახებ, რომ შევიტანოთ  სარჩელი საკონსტიტუციო სასამართლოში და სასამართლომ იმსჯელოს ამ ფაქტის კონსტიტუციურობაზე,“ – განაცხადა პეტრე ზამბახიძემ.

აჭარის მთავრობის თავმჯდომარის, ზურაბ პატარაძის თქმით, კანონი არ დარღვეულა, ის აირჩია უმაღლესმა საბჭომ და დაინიშნა კანონის ფარგლებში აჭარის მთავრობის თავმჯდომარედ: „თუ „ნაციონალურ მოძრაობას“ სურს, რომ სასამართლოზე შეიტანონ სარჩელი, პრობლემაც არ იქნება, როგორც სურთ, ისე მოიქცნენ“.

ზურაბ პატარაძე უმაღლესმა საბჭომ აჭარის მთავრობის თავმჯდომარედ 2016 წლის 15 ივლისს აირჩია.  ერთი დღით ადრე კი საქართველოს პრეზიდენტის განკარგულებით, რომელსაც პრემიერმაც მოაწერა ხელი, გადაყენებული იქნა აჭარის მთავრობა და ჩამოყალიბდა სახელმწიფო რწმუნებულის ადმინისტრაცია.

ნეტგაზეთის მასალების სხვა გამოცემებში გადაბეჭდვის წესი
როინ გუნდაძე