„თქვენ გგონიათ, რომ გადაურჩებით ამ დანაშაულისთვის სასჯელს, ვერ გადაურჩებით. თქვენ გაქვთ იმედი სასამართლო კლანის, რომელიც, სწორედ იმიტომ გყავთ სასამართლოში, რომ გაექცეთ ყველა იმ დანაშაულს, რომელიც ქართველი ხალხის წინააღმდეგ ჩაიდინეთ და გაქვთ იმედი, რომ კლანი არ გაგასამართლებთ.
მაგრამ თქვენ გელოდებათ სამყაროში ყველაზე საშინელი სამსჯავრო, რომელსაც ვერ გადაურჩებით, თქვენი შვილების სამსჯავრო გელოდებათ, რომელსაც პასუხს ვერ გასცემთ“, – მიმართა საქართველოს პარლამენტის წევრმა, ანა ნაცვლიშვილმა ტრიბუნიდან „ოცნების“ დეპუტატებს.
მას ხმაურით და შეძახილებით უპასუხეს.
ანა ნაცვლიშვილმა პარლამენტის ტრიბუნიდან მოქალაქეებს საპროტესტო აქციებზე მისვლისკენ მოუწოდა:
„გამოდით დღეს პარლამენტთან, იმიტომ, რომ გავრილოვის უმრავლესობა აპირებს მიიღოს რუსული კანონი ქართულად დაწერილი. დაგიწყვიათ ეს ქართული და ევროპის დროშები, რუსული დროშები გაქვთ თქვენ გადმოფენილი, იმიტომ, რომ ემსახურებით რუსეთს და არა ქართველი ხალხის ინტერესებს.“
მან თავის გამოსვლაში აქციაზე პოლიციის მხრიდან ძალის გადამეტებაზეც გააკეთა აქცენტი:
„არგუმენტებს რომ ითხოვთ, ვნახეთ გუშინ თქვენი არგუმენტები. მუშტი და ძალადობა არის თქვენი არგუმენტები. დემოკრატიულ კანონებს არ სჭირდება ძალადობა, დემოკრატიულ კანონების მისაღებად სპეცრაზმს არ უქსევენ ახალგაზრდებს. თქვენ გგონიათ, რომ გადაურჩებით ამ დანაშაულისთვის სასჯელს… თქვენი შვილების სამსჯავრო გელოდებათ, რომელსაც პასუხს ვერ გასცემთ, ამ ღალატისთვის, ქართველი ხალხის ღალატისთვის, ვერ გასცემთ პასუხს თქვენს შვილებს თვალებში ვერ ჩახედავთ.“
ჩვენ დავიცავთ ამ ქვეყანას, ჩვენ დავიცავთ ამ ქვეყნის ევროპულ მომავალს, მათ შორის დავიცავთ თქვენი შვილებისთვის და ყველას შვილებისთვის, იმიტომ, რომ ეს ქვეყანა არ გახდება რუსეთი, არ გახდება რუსეთი გავრილოვებო, რამდენიც არ უნდა ეცადოთ. არ გახდება ეს ქვეყანა რუსეთი, არა რუსულ კანონს, არა რუსულ კანონს… არა საქართველოს გასაბჭოებას, ვერ მოესწრებით ამას“, – განაცხადა ანა ნაცვლიშვილმა ტრიბუნიდან.
ამ გამოსვლის შემდეგ ანა ნაცვლიშვილმა სხდომათა დარბაზში წაიკითხა რუსი მწერლის, დისიდენტის, ბორის აკუნინის [გრიგორი ჩხარტიშვილი] მიმართვა.
„მე ახლა წავიკითხავ საქართველოში დაბადებული და პუტინის, მიერ ამ კანონით აგენტად გამოცხადებული გრეგორი ჩხარტიშვილის მიმართვას.“
___
ეს კანონი სიმსივნესავით გამოჭამს საქართველოს – აკუნინი ქართველებს მოუწოდებს არ დათმონ თავისუფლება.
ეს კანონი სიმსივნესავით გამოჭამს საქართველოს – აკუნინი ქართველებს მოუწოდებს არ დათმონ თავისუფლება
