ეროვნული ბიბლიოთეკის დირექტორი, გიორგი კეკელიძე ფეისბუქის პირად გვერდზე წერს, რომ საქართველოს პარლამენტის თავმჯდომარემ, შალვა პაპუაშვილმა მას დაკავებული თანამდებობიდან წასვლა მოსთხოვა.
გიორგი კეკელიძე წერს, რომ ამის მიზეზეად შალვა პაპუაშვილმა 11 წელი დაუსახელა – რომ „ბევრია“:
„პარლამენტის თავმჯდომარე შემხვდა და მითხრა, რომ უნდა წავიდე დაკავებული თანამდებობიდან, რადგან 11 წელი ბევრია, მიუხედავად იმისა, რომ კარგად ვმუშაობდი და განახლების დროა. მე მშვიდად ვუთხარი, რომ იურიდიულად ეს მისი გადასაწყვეტია, მაგრამ არსებობს სხვა სამართალი და ამ სამართლით, ეს არის ძალიან დიდი უსამართლობა. მერე გამოვედი, პარლამენტის კიბეზე ჩამოვჯექი და ვფიქრობდი იმ საოცარ გეგმებზე, საოცარ ხალხთან ერთად რომ მქონდა, იმ წლებზე, დღეებზე და წუთებზე, რომელიც ამ საქმეს შევალიე და რომ მქონდა ერთი დიდი ოცნება – გამეხსნა ლეგენდარული პირველი კორპუსი, რომლის რესტავრაცია უკვე დაიწყო და მე უკვე შორიდან გავიხარებ ამ ამბით. და მერე გამახსენდა, რომ ეს არის ჩვენებური ალგორითმი და რომ ეს ასეც უნდა მომხდარიყო“.
გიორგი კეკელიძე ეროვნული ბიბლიოთეკის დირექტორად 2012 წელს დანიშნეს.
გიორგი კეკელიძის გათავისუფლების მოტივების გასარკვევად „ბათუმელები“ საქართველოს პარლამენტს დაუკავშირდა. ინფორმაცია, მიღების შემთვევაში აქვე განახლდება.
ეროვნული ბიბლიოთეკა საქართველოს პარლამენტს ექვემდებარება.
