სააპელაციო სასამართლომ ძალაში დატოვა ძმები წულუკიძეების საქმეზე საქალაქო სასამართლოს გადაწყვეტილება. საქალაქო სასამართლომ ძმებს – რეზო და ფირუზ წულუკიძეებს, ასევე ელდარ ანთაძეს, 5 წლით თავისუფლების აღკვეთა მიუსაჯა, ძმებ ჭელიძეებსა და მათ ბიძაშვილებს კი – 4 წლით.
წულუკიძეების ადვოკატი დავით ჯაფარიძე წულიკიძეების საქმეს 5 ივლისის საქმეს ადარებს და ამბობს, რომ სასამართლომ ამ ორ შემთხვევაში ორმაგი სტანდარტი გამოიყენა.
„5 ივლისის საქმეზე მოსამართლემ გამორიცხა ჯგუფური მოქმედება, იგივე მასობრივი არეულობა. მოსამართლე მაია თეთრაულმა მიიჩნია, რომ ჯგუფური მოქმედება უნდა იყოს ორგანიზებულად წარმოებული და უნდა ჰყავდეს ხელმძღვანელი. უზენაესმა სასამართლომ დატოვა ძალაში ეს გადაწყვეტილება და ისინი გათავისუფლდნენ. აქ მხოლოდ ერთწუთიანი ბრძოლა იყო. დავანებოთ თავი იმას, რომ უძლიერესი კაცები დაესხნენ თავს ფირუზს და სხვებს. ერთწუთიანი ფიზიკური დაპირისპირება იყო ეს. ანუ დაუშვეს ორმაგი სტანდარტი. “
ადვოკატი ამბობს, რომ მან ქუთაისის სააპელაციო სასამართლოს წარუდგინა მაია თეთრაულის განაჩენი 5 ივლისის საქმეზე და ასევე, უზენაესი სასამართლოს განჩინება, სადაც პროკურორის საჩივარი დაუშვებლად ცნეს.
„დაუშვეს ორმაგი სტანდარტი. ამ სამმა მოსამართლედ წოდებულმა გამოგვიცხადა განაჩენი, არც კი აგვიხსნეს, როგორ და რატომ. მოკლედ, არ უშვებენ წულუკიძეებს, იმიტომ, რომ ეშინიათ მომავალ არჩევნებზე არ გაუწიონ წინააღმდეგობა. ამას ვამბობ დარწმუნებით. გათელეს ფეხქვეშ კანონი. ასეთი სამარცხვინო მართლმსაჯულება სააკაშვილის დროსაც კი არ ჰქონია სასამართლოს“ – ამბობს ადვოკატი.
ბრალდებული ძმები წულუკიძეები, ჭელიძეები და ელდარ ანთაძე რიონის ხეობის დასაცავად გამართულ აქციაში 12 აპრილს მონაწილეობდნენ. მათ სწორედ იმ დღეს მომხდარი ინციდენტის გამო წაუყენეს ბრალი ჯგუფური ძალადობის მუხლით.
დაკავებულები ამტკიცებენ, რომ პოლიციამ რიონის ხეობაში პროვოკაცია მოუწყო და პოლიტიკური ნიშნით გაუსწორდნენ, რადგან ისინი „ნაციონალური მოძრაობის“ მხარდამჭერები არიან.
გამოძიების ვერსიით, ძმები წულუკიძეები, ჭელიძეები და ელდარ ანთაძე, სულ 7 პირი, რიონის ხეობაში მოქალაქეებზე ძალადობის ბრალდებით დააკავეს.
პრეზიდენტმა სალომე ზურაბიშვილმა ძმები თორნიკე და თამაზ ჭელიძეები შეიწყალა, წულუკიძეები და ელდარ ანთაძე კი – არა.
დღეს, 5 დეკემბერს, ამ საქმესთან დაკავშირებით ბრიფინგი გამართა აჭარის უმაღლესი საბჭოს ენმ-ის ფრაქციის თავმჯდომარემ, ელგუჯა ბაგრატონმა. „ერთიანი ნაციონალური მოძრაობა“ პრეზიდენტ სალომე ზურაბიშვილს სთხოვს, შეიწყალოს ძმები წულუკიძეები და ამით დაასრულოს პოლიტიკური დევნა ძმების წინააღმდეგ.
ადვოკატის თქმით, გადაწყვეტილებას უზენაეს სასამართლოში გაასაჩივრებენ.
_____________
ფოტოზე: ფირუზ წულუკიძე „რიონის ხეობის დამცველების“ აქციაზე. ფოტო „ბათუმელების“ არქივიდან.
