„ჩვენს ქუჩაზე სულ დიდი სიჩქარით მოძრაობენ ავტომანქანები, შუქნიშნის გარეშე ძალიან რთულია გადაკვეთო ქუჩა, თანაც, ჩემი შვილი შშმ პირია, როგორ გადავდივარ, არ მკითხოთ,“ – ამბობს მზიური ბალაძე. ის ბათუმში, აეროპორტის გზატკეცილზე ცხოვრობს.
მოქალაქის თქმით, შუქნიშანი აეროპორტის გადასახვევთან დაახლოებით ერთი კვირის წინ გაფუჭდა. მოქალაქეს 112-ში დაურეკავს, თუმცა ამ დრომდე არაფერი შეცვლილა.
„ორჯერ დავრეკე 112-ში, დამპირდნენ, რომ გადასცემდნენ ინფორმაციას და მოაგვარებდნენ პრობლემას, მაგრამ არაფერი. ჩვენი დასახლების რწმუნებულსაც ვურეკავდი, იმან საერთოდ არ უპასუხა ტელეფონს.
შუქნიშნის ბოძს, როგორც გავიგე, ავტომანქანა დაეჯახა და მას შემდეგ არის ასე: მხოლოდ ყვითელი ფერია ჩართული. განსაკუთრებით ბავშვებს უჭირთ გადასვლა, ყველა აცილებს ბავშვს მეორე მხარეს, რომ რამე არ მოხდეს,“ – აღნიშნა მზიური ბალაძემ „ბათუმელებთან“.
საკითხზე კომენტარს „ბათუმის ავტოტრანსპორტის“ პრესცენტრში დაგვპირდნენ, თუმცა ინფორმაცია არ მოგვაწოდეს.
