ვიდრე „სითი ინსტიტუტი საქართველო“ მერიის დაკვეთით ბათუმის გენგეგმაზე მუშაობს, ქალაქის ინფრასტრუქტურა ყოველდღე იცვლება.
ამჯერად ისტორიული შენობა აბუსერიძის ქუჩაზე, #11-ის მიმდებარედ დაანგრიეს. აქ მრავალფუნქციური კომპლექსის მშენებლობას გეგმავენ. კომპლექსი 41 და 37 სართულიან ორ შენობას აერთიანებს.
ნგრევის კადრები სოციალურ ქსელში მოქალაქეებმა გაავრცელეს. ბევრი წერს, რომ არ ეთანხმება განაშენიანების ისეთ პოლიტიკას, რაც ბათუმს იერსახეს უკარგავს.
დოკუმენტების მიხედვით კომპანიამ სამშენებლო ნებართვის მისაღებად სამი საკადასტრო ერთეული გააერთიანა. საერთო ჯამში მშენებლობა 6624 კვ.მეტრზე იგეგმება.
სამშენებლო ადგილი ძეგლის დაცვის ზონაშია. აბუსერიძის ქუჩაზე, #11-ში კლასიკური ბალეტის სკოლის შენობას კულტურული მემკვიდრეობის ძეგლის სტატუსი აქვს.
არქიტექტურული პროექტი კომპანიამ მერიას 2019 წელს შეათანხმა, საბოლოო ნებართვა კი 2022 წელს გასცეს.
არსებული სიტუაცია
„მერიას მიზანშეწონილად მიაჩნია განმცხადებლის მოთხოვნის დაკმაყოფილება, ვინაიდან სამშენებლო ობიექტი სივრცით-მოცულობითი და
არქიტექტურულ-ვიზუალური თვალსაზრისით სრულად აკმაყოფილებს არსებული ტერიტორიის ურბანული განაშენიანებისა და განვითარების პრინციპებს, ასევე საპროექტო ტერიტორიის ირგვლივ არსებული განაშენიანებისა და ქალაქმშენებლობითი პარამეტრების მოთხოვნებს.“ – განმარტავს მერია.
პროექტის რენდერი
მშენებლობას შპს 245 „ტერინალი 99“ გეგმავს. კომპანიას მალხაზ მამუჭაძე, მერაბ ქოქოლაძე და შპს „ნექსთ თაუნი“ ფლობენ. ამ კომპანიის მფლობელი კი კახა დევაძეა.
