დღეს, 29 აგვისტოს, გამოცდების ეროვნულმა ცენტრმა 2023 წლის ეროვნული გამოცდების აპელაციის შედეგებთან დაკავშირებით განცხადება გააკეთა.
ცენტრის ინფორმაციით, ეროვნული გამოცდების შედეგები მთლიანობაში 4 292-მა პირმა გაასაჩივრა. ყველაზე მეტმა გამოსაცდელმა ქართული ენისა და ლიტერატურის გამოცდის შედეგი გაასაჩივრა, ყველაზე ნაკლებმა კი – ფრანგული ენის გამოცდის შედეგი.
გასაჩივრებული ნაშრომების რაოდენობა საგამოცდო საგნების მიხედვით:
- ქართული ენა და ლიტერატურა – 1588;
- ზოგადი უნარები (სომხურ ენაზე) – 37;
- ზოგადი უნარები (აზერბაიჯანულ ენაზე) – 41;
- ინგლისური ენა – 754;
- რუსული ენა – 15;
- გერმანული ენა – 19;
- ფრანგული ენა – 2;
- მათემატიკა – 510;
- ისტორია – 796;
- გეოგრაფია – 29;
- ბიოლოგია – 228;
- ქიმია – 60;
- ფიზიკა – 40;
- ლიტერატურა – 52;
- ხელოვნება – 7;
- სამოქალაქო განათლება – 114.
ცენტრის ინფორმაციით, შეფასება შეიცვალა სულ 1498 ნაშრომის შემთხვევაში, „რაც მთელი ნაშრომების მხოლოდ 1.17%-ია. ქულა მოემატა 1473 ნაშრომს, ხოლო ქულა დააკლდა 25 ნაშრომს“.
აბიტურიენტებს, რომლებსაც აპელაციის შედეგად შეეცვალათ შეფასება ან უარი თქვეს საპრეტენზიო განაცხადის წარდგენაზე, აპელაციისათვის გადახდილი თანხა წინასწარ გამოქვეყნებულ ვადებში წარმოდგენილი განცხადების საფუძველზე უკან დაუბრუნდებათ.
„შეგახსენებთ, რომ იმ საგნებში, რომლებშიც ტესტის ერთზე მეტი ვარიანტი იყო, ხდება ნედლი ქულების გათანაბრება, რის შედეგადაც ის აბიტურიენტი, რომლის გათანაბრებული ქულაც მინიმალურ ზღვარზე მეტია, აგრძელებს კონკურსში მონაწილეობას.
პროგრამების რეიტინგულ ჩამონათვალში ცვლილებების შეტანის სურვილის შემთხვევაში გამოსაცდელები უნდა ეწვიონ თავიანთ სარეგისტრაციო გვერდს. ნებისმიერი ცვლილების შეტანისას (პროგრამების გადანაცვლება, წაშლა, დამატება) აუცილებელია შენახვის ღილაკის გამოყენება და მონაცემების შენახვა, წინააღმდეგ შემთხვევაში ცვლილებები სისტემაში არ აისახება“, – აცხადებს გამოცდების ცენტრი.
მათივე ინფორმაციით, საგანმანათლებლო პროგრამების რეიტინგულ სიაში ცვლილებების შეტანის ვადა 30 აგვისტოა.
