2023 წლის ბოლოს ამერიკის შეერთებული შტატები იწყებს „ყოვლისმომცველ სტრატეგიულ დიალოგს“ ბელარუსის ოპოზიციასთან და სამოქალაქო საზოგადოების წარმომადგენლებთან.
აშშ-ის სახელმწიფო დეპარტამენტის ცნობით, 22 მარტს სახელმწიფო მდივნის მოადგილე ვენდი შერმანი ვაშინგტონში, ბელარუსის დემოკრატიული პარტიის ლიდერს, სვეტლანა ტიხანოვსკაიას შეხვდა.
„აშშ-ის სახელმწიფო მდივნის მოადგილემ გამოხატა შეერთებული შტატების მუდმივი მზადყოფნა, მხარი დაუჭიროს ბელარუსი ხალხის სწრაფვას ბელარუსის დემოკრატიული, სუვერენული და სტაბილური მომავლისკენ“ – წერია აშშ-ის დეპარტამენტის ვებგვერდზე გამოქვეყნებულ ინფორმაციაში.
პრესრელიზში ასევე ნათქვამია, რომ ვენდი შერმანმა ტიხანოვსკაიას უთხრა აშშ-ს განზრახვის შესახებ, დაიწყოს სტრატეგიული დიალოგი ბელარუსის დემოკრატიულ მოძრაობასთან და სამოქალაქო საზოგადოებასთან 2023 წლის ბოლოს.
ვაშინგტონში ვიზიტისას სვეტლანა ტიხანოვსკაიას აშშ-ს კონგრესში მოუსმინეს, სადაც ტიხანოვსკაიამ გააკრიტიკა ალექსანდრე ლუკაშენკოს პოლიტიკა, რომელმაც კრემლს მისცა საშუალება, გამოიყენოს ბელარუსი უკრაინაზე თავდასხმისთვის.
აშშ-ში ტიხანოვსკაია ასევე შეხვდა ნენსი პელოსს, აშშ-ს წარმომადგენელთა პალატის ყოფილ თავმჯდომარეს, რომელთანაც განიხილა რუსეთის ჰიბრიდული საოკუპაციო პოლიტიკა და ლუკაშენკოს რეჟიმი.
ბელარუსი ოპოზიციონერი ლიდერი, სვეტლანა ტიხანოვსკაია, 2020 წლის გაყალბებული არჩევნების შემდეგ ბელარუსში მის წინააღმდეგ დაწყებული პოლიტიკური დევნის გამო ლიეტუვაში ცხოვრობს.
2020 წლის აგვისტოს საპრეზიდენტო არჩევნებში სვეტლანა ტიხანოვსკაია ოპოზიციის საერთო კანდიდატი იყო, თუმცა ცესკოს ოფიციალური შედეგებით ხმების მხოლოდ 10% მიიღო. ლუკაშენკოს 25-წლიანი მმართველობისა და საერთაშორისო დამკვირვებლების არყოფნის ფონზე, მან ოფიციალური შედეგები არ აღიარა და თავი გამარჯვებულად გამოაცხადა.
არჩევნების შემდეგ ანტისამთავრობო დემონსტრაციები დაიწყო, რაზეც ლუკაშენკომ ძალის გამოყენებით უპასუხა. ტიხანოვსკაია იძულებული გახდა, ქვეყანა დაეტოვებინა. ემიგრაციაში ყოფნისას იგი სხვადასხვა ქვეყნის ლიდერთან შეხვედრებს მართავს.
______________
ფოტოზე: სვეტლანა ტიხანოვსკაია და ვენდი შერმანი/twitter
