შეფასებისა და გამოცდების ეროვნული ცენტრის ინფორმაციით, საატესტატო გამოცდები ქართულ ენასა და უცხო ენაში დასრულებულია, მთლიანობაში 5 ათასზე მეტმა მოსწავლემ ვერ გადალახა ბარიერი (5,5). ცენტრის დირექტორის მოადგილე, ივა მინდაძის შეფასებით, წელს უფრო მეტია ჩაჭრილი მოსწავლეების რიცხვი, ვიდრე გასულ წელს იყო.
მოსწავლეები ამჟამად ოთხ გამოცდას აბარებენ. ქართული, უცხო ენა, ისტორია და მათემატიკა. ქართულ ენასა და უცხო ენაში გამოცდა უკვე ჩატარდა, დღეს 23 მაისს მოსწავლეები ისტორიას აბარებენ, ხვალ კი მათემატიკას.
„გარდა ამისა, ამავე პერიოდში იმ აბიტურიენტებს, რომლებმაც ვერ დაძლიეს მე-11 კლასის ქიმიის, ფიზიკის, გეოგრაფიისა და ბიოლოგიის გამოცდები, აქვთ შესაძლებლობა, რომ ეს გამოცდები ჩააბარონ წელს, ამას დაემატა ექსტერნებიც და ამათი ერთობლიობა შეადგენს 47 ათას მოსწავლეს“.
ივა მინდაძის ინფორმაციით, თითოეულ გამოცდას მოსწავლეების სხვადასხვა რაოდენობა წერს, „დაალოებით 42 ათასი წერს ქართულს, ისტორიას და ა.შ. და ქიმიას და ფიზიკას, ცხადია, ამდენი არ წერს.
ქართულის გამოცდაზე 42 ათასზე მეტი მოსწავლე გავიდა, 1000 მოსწავლე კი არ გამოცხადდა გამოცდაზე. ქართულ ენაში 97-მა პროცენტმა გადალახა ბარიერი, 85-მა კი უცხო ენებში.
საატესტატო გამოცდები 25 მაისს დასრულდება და საბოლოო შედეგები მხოლოდ ამის შემდეგ გახდება ცნობილი.
