დიდი ბრიტანეთი 2023 წელს უკრაინას 250 მილიონი ფუნტის ღირებულების საარტილერიო საბრძოლო მასალას მიაწვდის – ამის შესახებ ქვეყნის პრემიერ-მინისტრმა რიში სუნაკმა განაცხადა დღეს, 19 დეკემბერს, რიგაში, გაერთიანებულ საექსპედიციო ძალებში მონაწილე ქვეყნების [JEF] შეხვედრის წინ, რომელსაც ესწრებიან დანიის, ფინეთის, ესტონეთის, ისლანდიის, ლატვიის, ლიტვის, ნიდერლანდების, შვედეთის, ნორვეგიისა და დიდი ბრიტანეთის ლიდერები.
მან მოუწოდა JEF-ის ლიდერებს, შეინარჩუნონ დახმარების ტემპი ან მეტი გააკეთონ უკრაინის მხარდასაჭერად 2023 წელს.
მედიის ცნობით, ლონდონმა უკრაინას ომის დაწყებიდან, 2022 წლის თებერვლიდან დღემდე 100 000-ზე მეტი საბრძოლო მასალა მიაწოდა.
ცნობილია, რომ დღეს რიგაში შეხვედრის მონაწილეები უკრაინის საჰაერო თავდაცვის გაძლიერების აუცილებლობასაც განიხილავენ.
დიდი ბრიტანეთი არის უკრაინის სამხედრო დახმარების სიდიდით მეორე დონორი, ამერიკის შეერთებული შტატების შემდეგ.
___________________
ფოტოზე: რიში სუნაკი, დიდი ბრიტანეთის პრემიერ-მინისტრი. ფოტო: EPA-EFE/ANDY RAIN
