დღეს, პირველ დეკემბერს, განათლების მინისტრმა პარლამენტში ისაუბრა სკოლებში მოსწავლეთა კვების საკითხზე.
„სამინისტროს ინიციატივითა და გაეროს ბავშვთა ფონდის ჩართულობით მუშაობა დაიწყო უწყებათაშორისმა ჯგუფმა, რომელიც სასკოლო კვებასთან დაკავშირებით კონკრეტულ გეგმას შეიმუშავებს და საქართველოს პრემიერ-მინისტრს, ირაკლი ღარიბაშვილს წარუდგენს.
შევისწავლეთ ადგილობრივი შესაძლებლობები, საუკეთესო საერთაშორისო პრაქტიკა და მიმდინარეობს სასკოლო კვების კონცეფციაზე აქტიური მუშაობა. განიხილება კვების მიწოდების სხვადასხვა მოდელი სურსათის უვნებლობის ექსპერტების და სხვა პროფესიონალების ჩართულობით ქვეყნის მასშტაბით რეგიონებისა და რაიონების სპეციფიკის გათვალისწინებით.
აღნიშნულ პროცესში პარლამენტის დარგობრივი კომიტეტებიც აქტიურად ჩაერთვებიან“, – განაცხადა მინისტრმა.
მიხეილ ჩხენკელის თქმით, დოკუმენტი, რომელსაც ხელი მოაწერეს განათლების სამინისტრომ და გაეროს ბავშვთა ფონდმა, საქართველოს სკოლებში მოსწავლეთა სასკოლო კვების პროგრამის დანერგვის ხელშეწყობის კუთხით კონკრეტული ნაბიჯების გადადგმას ითვალისწინებს.
„ბათუმელები“ 12 სექტემბერს ესაუბრა გაეროს ბავშვთა ფონდს და ჰკითხა, თუ რა გაკეთდა ერთი წლის განმავლობაში პროგრამის დანერგვის თვალსაზრისით. მაშინ გვითხრეს: „ეს ძალიან რთული, კომპლექსური პროგრამაა. ჯერჯერობით რაიმე კონკრეტულს ვერ ვამბობთ, რადგან აქ წამყვანი განათლების სამინისტროა, ჩვენ უბრალოდ ვეხმარებით“.
ფონდის თქმით, „ამ ეტაპზე“, ანუ სექტემბრის თვეში ჯერჯერობით მხოლოდ სხვადასხვას მოდელს იკვლევდნენ და ამის შემდეგ შეჯერდებოდნენ რომელიმე მოდელზე.
თუ მინისტრის დღევანდელი განცხადებით ვიმსჯელებთ, კონკრეტულ მოდელზე არჩევანი არც სამი თვის შემდეგ გაკეთებულა.
ბავშვთა უფასო კვების პროგრამა განათლების სამინისტროს 2020-2030 წლების ეროვნულ სტრატეგიაში არ შეუტანია.
____________________
ამ თემაზე:
„მშია მასწავლებელო“ – რა ისმის სკოლებში უფასო კვების დაპირებაზე?
