დიდი ბრიტანეთის დაზვერვა მიიჩნევს, რომ უკრაინის კრიტიკულად მნიშვნელოვან ინფრასტრუქტურაზე რუსეთის თავდასხმების მიზანი მოსახლეობის მებრძოლი სულის გატეხაა.
„10 ოქტომბრის შემდეგ რუსეთმა უკრაინის ენერგოინფრასტრუქტურაზე დარტყმების მთელი სერია განახორციელა. დღეისთვის, ამ თავდასხმებმა ტალღისებრი ხასიათი მიიღო,“ – წერს უწყება 11 ნოემბრის რელიზში და აღნიშნავს, რომ 31 ოქტომბერს, უკანასკნელი ყველაზე მასშტაბური შეტევისას, რუსეთმა პირველად ამოიღო მიზანში ჰიდროელექტროსადგურები.
„თავდასხმებმა სერიოზულად დააზიანა გადამცემი ხაზები და ელექტროსადგურები. დენის დაგეგმილი თუ მოულოდნელი გათიშვები უკრაინის ქალაქებში, განსაკუთრებით კი კიევში, ყოველდღიურ ამბად იქცა,“ – დაზვერვა მიუთითებს, რომ ქსელის დაზიანება ავტომატურად იწვევს წყლისა და გათბობის პრობლემებს, რაც ზამთრის პირობებში განსაკუთრებით მძიმედ დააწვება უკრაინის მოსახლეობას.
უწყების შეფასებით, რუსეთის თავდასხმები უკრაინის ენერგოქსელებსა და სადგურებზე სრულიად დისპროპორციული ზომაა მშვიდობიანი მოსახლეობის წინააღმდეგ და მას მხოლოდ ერთი მიზანი შეიძლება ჰქონდეს:
„რუსეთი უპირატესობას ანიჭებს არა სამხედრო, არამედ კრიტიკულ ინფრასტრუქტურულ სამიზნეებზე დარტყმას. ეს ცხადად მიუთითებს, რომ ამით ის უკრაინის მოსახლეობის საბრძოლო სულის გატეხას ცდილობს“.
გაერთიანებული სამეფოს თავდაცვა უკრაინის შესახებ სადაზვერვო ცნობარს ყოველდღიურად აქვეყნებს. გუშინდელ რელიზში უწყება დაზვერვა ხერსონიდან ჯარების გაყვანის შესახებ რუსეთის ხელისუფლების გადაწყვეტილებას აფასებდა. უწყების აზრით, ხერსონის დასავლეთი ნაწილის„დაკარგვა“ რუსეთს ძალიან შეუშლის ხელს თავისი ერთ-ერთი სტრატეგიული მიზნის მიღწევაში – შექმნას სახმელეთო ხიდი ოდესამდე.
