რუსეთის სამხედრო-პოლიტიკურმა ხელმძღვანელობამ თავის სამხედროებს „ჰაიმარსის“ სარაკეტო საარტილერიო სისტემების განადგურება დაავალა – ასეთი ბრძანება რუსეთის თავდაცვის მინისტრმა, სერგეი შოუგუმ გასცა.
თავდაცვის უწყების მიერ ტელეგრამ არხზე გამოქვეყნებულ ინფორმაციაში ნათქვამია, რომ სერგეი შოიგუმ „აღმოსავლეთის“ სარდლობის ინსპექცია ჩაატარა და მის უშუალო მეთაურს, გენერალ-ლეიტენანტ რუსტამ მურადოვს დაავალა, „გაანადგუროს უკრაინის შეიარაღებული ძალების შორსმოქმედი სისტემები“.
რუსტამ მურადოვი 2018 წლიდან სამხრეთის სამხედრო ოლქის ძალებს მეთაურობდა, 2020-2021 წლებში კი – რუს „მშვიდობისმყოფელებს“ მთიან ყარაბაღში. მურადოვი მანამდე სირიაში რუსეთის სამხედრო მრჩეველი იყო.
ის ახლა უკრაინაში „აღმოსავლეთის“ მიმართულებას ხელმძღვანელობს და იმ რუსი მაღალჩინოსნების სიაშია, ვისაც ევროკავშირის პერსონალური სანქციები შეეხება.
ბოლო კვირების განმავლობაში, მას შემდეგ, რაც უკრაინამ ამერიკული შორსმოქმედი სისტემები მიიღო, ოკუპირებულ ტერიტორიებზე გახშირდა რუსული საბრძოლო საწყობების აფეთქება.
გუშინ ოკუპირებულ ალჩევსკში (ლუგანსკის ოლქი) უკრაინის შეიარაღებულმა ძალებმა „ჰაიმარსის“ დახმარებით გაანადგურეს რუსების საბრძოლო მასალების საწყობი, ტროლეიბუსების დეპოს ტერიტორიაზე.
14 ივლისს კი, უკრაინელმა სამხედროებმა რუსების საწყობებს ნიკოლაევსა და ხარკოვში დაარტყეს.
