მარიუპოლიდან სამოქალაქო პირების ბოლო ევაკუაციის დროს რუსმა ჯარისკაცებმა დედა და 4 წლის შვილი დააშორეს – ინფორმაციას ტელეგრამზე ავრცელებს პოლკი „აზოვი“ , რომლის მებრძოლებიც ამჟამად „აზოვსტალში“ არიან გამაგრებული.
გუშინ, 8 მაისს, 4 წლის ალისა რუსული ფილტრაციის ბანაკის გავლის შემდეგ დედის გარეშე ჩავიდა ზაპოროჟიეში, დედის ადგილსამყოფელი კი უცნობია.
წინასწარი ინფორმაციით, ალისას დედა სამხედრო ექიმია.
„ვთხოვთ, მსოფლიო საზოგადოებას ჩაერიოს და შვილი დედას დაუბრუნონ“ – წერს პოლკი „აზოვი“.
ალისას შესახებ წერს უკრაინელი ჟურნალისტი ნატალია ნაგორნაც, რომელმაც ბავშვი აზოვსტალიდან ზაპოროჟიეში ჩასულ ავტობუსში მარტო მყოფი შენიშნა.
„ავტობუსში, რომელიც აზოვსტალიდან ზაპოროჟიეში ჩამოვიდა, უკანა სავარძელზე პატარა გოგო იწვა. ჯერ ვერ ვიცანი, გვერდით მყოფ გოგოს ვთხოვე მასთან საუბრის ნებართვა. მაგრამ ეს არ იყო დედამისი. ეს იყო უბრალოდ ადამიანი, რომელიც დასთანხმდა გოგონა მის გვერდით ყოფილიყო, რადგან დედამისი ტყვედ აიყვანეს.
…ოთხი წლის ბავშვის დედა დედის დღეს მოიპარეს“ – წერს ჟურნალისტი.
ალისა ავტობუსში. ფოტო: ნატალია ნაგორნა/facebook
მოგვიანებით, ინფორმაცია იმის შესახებ, რომ ბავშვმა ზაპოროჟიეში დედის გარეშე მიაღწია, დაადასტურა ზლატა ნეკრასოვამ, Zaporozhye OVA-ს ხელმძღვანელის მოადგილემ. მან ალისა სახლში წაიყვანა და ინსტაგრამზე ალისასთან ერთად ვიდეოც გამოაქვეყნა.
„ბავშვი ჩემთანაა, სახლში. მოვა სპეციალური სამსახური, გავაფორმებთ ყველა საჭირო დოკუმენტს და დაათვალიერებენ, რა პირობებში ცხოვრობს ბავშვი. თუ მოვლენ ნათესავები [მას ბიძა ჰყავს], მას გადავცემთ. გვაქვს კონტაქტი ნათესავებთან, ველით, როდის მოვლენ“ – ამბობს ნეკრესოვა.
4 წლის ალისა ცნობილი გახდა 17 აპრილს გამოქვეყნებული ვიდეოთი, რომელიც „აზოვმა“ გაავრცელა. ვიდეოში ბუნკერში, სიბნელეში მყოფი პატარა გოგო ამბობდა, რომ უნდოდა ევაკუაცია, სახლში ყოფნა და ბებია სვეტას უთვლიდა მოკითხვას.
19 აპრილს უკრაინის საფეხბურთო კლუბ „შახტარის“ ფეხბურთელები სტამბულში, ამხანაგურ მატჩზე სტადიონზე გავიდნენ მაისურით, რომელზეც ალისას ფოტო იყო და მისი სიტყვები: „სახლში მინდა დაბრუნება“. უკრაინელ ფეხბურთელებს სურდათ ალისას ისტორიით ეჩვენებინათ, რა ხდებოდა მარიუპოლში.
ბავშვისა და დედის დაშორების შესახებ BBC Ukraine-მ უკრაინის ვიცე-პრემიერს, ირინა ვერეშჩუკს, სთხოვა კომენტარი, თუმცა მას ამ დრომდე არაფერი უთქვამს აღნიშნულთან დაკავშირებით.
