ტარას შევჩენკოს სახელობის კიევის უნივერსიტეტი აჭარის მთავრობის თავმჯდომარის, თორნიკე რიჟვაძის შესახებ განცხადებას ავრცელებს.
კერძოდ, უნივერსიტეტი აცხადებს, რომ აჭარის მთავრობის თავმჯდომარეს არ მიუღია კიევის უნივერსიტეტის დიპლომი და ინფორმაცია იმის შესახებ, რომ რიჟვაძეს აქვს დოქტორის ხარისხი, სიმართლეს არ შეესაბამება.
„2015 წელს ჩააბარა კიევის ტარას შევჩენკოს ეროვნული უნივერსიტეტის საერთაშორისო ურთიერთობების ინსტიტუტის სამაგისტრო პროგრამაში, ხოლო 2017 წელს ოჯახური გარემოების გამო, საკუთარი სურვილით გარიცხეს. ამრიგად, სწავლის ეს პერიოდი არ დასრულებულა სამეცნიერო ხარისხისა და კვალიფიკაციის მიღებით, რადგან სწავლა შეწყდა.
ჩვენ გულწრფელად ვწუხვართ, რომ მან, როგორც ჩვენმა ასპირანტმა, ვერ შეიყვარა უკრაინა“ – ვკითხულობთ განცხადებაში, რომელიც უნივერსიტეტმა გაავრცელა.
გუშინ, 7 მარტს, აჭარის მთავრობის თავმჯდომარემ, თორნიკე რიჟვაძემ, არ უპასუხა ჟურნალისტის შეკითხვას, ვინ დაიწყო ომი უკრაინაში. კითხვაზე – ომი უკრაინამ დაიწყო თუ რუსეთმა, აჭარის მთავრობის თავმჯდომარემ თქვა, რომ ამ კითხვას „დარგის ექსპერტებმა“ უნდა უპასუხონ.
დღეს, 8 მარტს, „მირატვორეცის“ [მშვიდობისმყოფელი] ცენტრმა, რომელიც მკვლევრების, ჟურნალისტებისა და სპეციალისტებისგან დაკომპლექტებულ არასამთავრობო ორგანიზაციას წარმოადგენს, აჭარის მთავრობის თავმჯდომარე, თორნიკე რიჟვაძე, რუსი სამხედრო დამნაშავეების თანამზრახველად და უკრაინაში რუსეთის შეჭრის უარმყოფლად გამოაცხადა.
ამავე თემაზე:
უკრაინული ორგანიზაცია რიჟვაძეს რუსი სამხედროების ხელშემწყობად ასახელებს
