მთავარი,სიახლეები

უკრაინული ორგანიზაცია რიჟვაძეს რუსი სამხედროების ხელშემწყობად ასახელებს

08.03.2022 • 3430
უკრაინული ორგანიზაცია რიჟვაძეს რუსი სამხედროების ხელშემწყობად ასახელებს

„მირატვორეცის“ [მშვიდობისმყოფელი] ცენტრმა, რომელიც მკვლევრების, ჟურნალისტებისა და სპეციალისტებისგან დაკომპლექტებულ არასამთავრობო ორგანიზაციას წარმოადგენს, აჭარის მთავრობის თავმჯდომარე, თორნიკე რიჟვაძე რუსი სამხედრო დამნაშავეების თანამზრახველად და უკრაინაში რუსეთის შეჭრის უარმყოფლად გამოაცხადა.

ორგანიზაცია უკრაინულ სამართალდამცავ უწყებებს რეაგირებას სთხოვს.

„რუსი სამხედრო დამნაშავეების თანამზრახველი;
უკრაინაში რუსეთის სამხედრო შეჭრის უარყოფა [24/02/2022];
საჯაროდ მნიშვნელოვანი ინფორმაციის მანიპულირება;
მონაწილეობა უკრაინის წინააღმდეგ ჰუმანიტარული აგრესიის აქტებში, რუსეთის მხრიდან საომარი მოქმედებების დროს“ – წერია ვებგვერდზე თორნიკე რიჟვაძის შესახებ.

„მირატვორეცი“ სთხოვს სამართალდამცავ ორგანოებს, განიხილონ ეს პუბლიკაცია, როგორც განცხადება ამ პირის მიერ უკრაინის ეროვნული უსაფრთხოების, მშვიდობის, კაცობრიობის უსაფრთხოებისა და საერთაშორისო სამართლისა და წესრიგის წინააღმდეგ მიმართული მიზანმიმართული ქმედებების ჩადენის შესახებ.

განცხადება ვებგვერდზე დღეს, 8 მარტს, გამოქვეყნდა.

განცხადებას თან ერთვის 7 მარტს გადაღებული ვიდეო, სადაც თორნიკე რიჟვაძე ჟურნალისტის კითხვაზე – ვინ დაიწყო ომი, უკრაინამ თუ რუსეთმა, პასუხს თავს არიდებს. “ეს უნდა ჰკითხოთ ამ დარგის ექსპერტებს. მე ვუსურვებ უკრაინელებს ამ ომის ძალიან მალე დასრულებას”, – თქვა რიჟვაძემ.

აქვე აღნიშნულია, რომ რიჟვაძე ტარას შევჩენკოს სახელობის კიევის სახელმწიფო უნივერსიტეტში სწავლობდა [რიჟვაძე ამ უნივერსიტეტის დოქტორანტი იყო].

უკრაინული ორგანიზაცია „მირატვორეცი“ უკრაინის ეროვნული უსაფრთხოების, მშვიდობის, ჰუმანურობის და საერთაშორისო სამართლის წინააღმდეგ დანაშაულის ნიშნების კვლევის ცენტრია, რომელიც სამართალდამცავი ორგანოებისა და სპეცსამსახურებისთვის აგროვებს ინფორმაციას პრორუსი ტერორისტების, სეპარატისტების, დაქირავებულების, ომის დამნაშავეებისა და მკვლელების შესახებ. ორგანიზაცია 2014 წელს შეიქმნა.

„ჩვენი კვლევის ობიექტების (სამშობლოს მოღალატეები, მებრძოლები, დაქირავებულები და ტერორისტები, რუსი სამხედრო მოსამსახურეები – ომის დამნაშავეები) სხვა ქვეყნების ტერიტორიებზე გამოვლენის მიზნით, ვიწვევთ უცხო სახელმწიფოების სამართალდამცავ ორგანოებს თანამშრომლობისთვის“, – წერია ვებგვერდზე.

“მირატვორეცის” ბაზაში ძირითადად რუსი სამხედროები არიან, თუმცა უკრაინულ მედიაგამოცემებზე დაყრდნობით, ამავე ბაზაში სხვა ქვეყნების, მათ შორის, უკრაინელი თანამდებობის პირები, რუსი ჟურნალისტები და სხვა პროფესიის ადამიანებიც ხვდებიან. ბაზაში პიროვნების დამატებისთვის ვებგვერდზე რეგისტრაცია და სპეციალური ფორმის შევსებაა საჭირო, რომელსაც თან უნდა ერთვოდეს შესაბამისი მტკიცებულებები.

ვებგვერდზე არის განყოფილება, სადაც შესაძლებელია განცხადების გაპროტესტებაც.

გადაბეჭდვის წესი


ასევე: