ხულოში, სოფელ წაბლანაში, მეწყერი ჩამოწვა. „ბათუმელები“ სოფელში მერის წარმომადგენელს რაულ მახარაძეს ესაუბრა, რომელიც ამბობს, რომ მეწყერმა ასი მეტრი სიგრძის გზა წაიღო. მისი თქმით, ამ ეტაპზე მეწყერი საცხოვრებელ სახლებს საფრთხეს არ უქმნის, თუმცა ძლიერი წვიმის შედეგად შესაძლოა მეწყრული პროცესები ისევ განვითარდეს.
„მეწყერი ჩამოწვა სოფლის ცენტრში მისვლამდე, სკოლასთან ახლოს და წაიღო ასი მეტრი სიგრძის გზა. ჩვენ გვაქვს შემოვლითი გზაც ჩანჩურისხევიდან და ჯერჯერობით ამ გზით ვისარგებლებთ“, – ამბობს რაულ მახარაძე.
დღეს, 4 ოქტომბერს, სკოლებში სასწავლო პროცესი განახლდა, თუმცა როგორც რაულ მახარაძე ამბობს, დღეს სოფელ წაბლანაში ბავშვები სკოლაში წასვლას ვერ შეძლებენ და სწავლა რამდენიმე დღე ონლან გაგრძელდება.
სოფელ წაბლანაში მეწყერი ჩამოწვა
სოფელ წაბლანაში მეწყერი 1989 წელსაც ჩამოწვა და თითქმის მთელი სოფელი მიწის ქვეშ მოიყოლა. მაშინ მეწყერის შედეგად წაბლანაში 19 ადამიანი დაიღუპა. მას შემდეგ, რამდენიმე წლის განმავლობაში, წაბლანის მოსახლეობა ბათუმში, პანსიონატებში ცხოვრობდა. მოგვიანებით მათი ნაწილი ისევ მშობლიურ სოფელში დაბრუნდა.
