დღეს, 12 ივლისს, ბათუმში მიკროავტობუსების მძღოლების ნაწილი გაიფიცა. ისინი ამბობენ, რომ ყველაფრის გაძვირების ფონზე ბათუმში სამარშრუტო ხაზებზე არსებული ტარიფი – 50 თეთრი, დაბალია და მგზავრობის გაძვირებას 20 თეთრით ითხოვენ.
ბათუმის მერიის საქალაქო ტრანსპორტის განყოფილების უფროსი ემზარ ქავჟარაძე „ბათუმელებთან“ ამბობს, რომ მძღოლების მოთხოვნა ვერ იქნება გათვალისწინებული, რადგან გაფიცვით ეს საკითხი ვერ გადაწყდება.
„შევხვდი მძღოლებს. ასე არ ხდება, ყველაფერს თავისი წესი აქვს. სანებართვო პირობაში წერია, როცა გაფიცვას აპირებენ, სამი დღით ადრე უნდა მომართონ მუნიციპალიტეტის მერიას, რომ გაჩერებას აპირებენ.
რამდენიმე თვის წინ ჩვენ მთლიანად მოვუხსენით სანებართვო გადასახადი, ეს შეღავათი გავაკეთეთ. სხვა შეღავათის გაკეთება ჩვენ არ შეგვიძლია ამ ეტაპზე“, – გვითხრა ემზარ ქავჟარაძემ.
მისივე თქმით, გაჩერებულია ძირითადად ერთი სამარშრუტო ხაზი, №24 და რამდენიმე მძღოლი სხვა სამარშრუტო ხაზიდან.
„ფასს ადგენს საკრებულო, უნდა მიმართონ მერიას, განიხილოს საკითხი საკრებულომ, ან დაამტკიცებენ, ან არა“ – აღნიშნა ემზარ ქავჟარაძემ.
ეს პირველი შემთხვევა არ არის, როცა ბათუმში სამარშრუტო ტაქსის მძღოლები ტარიფის გაზრდას ითხოვენ. მსგავსი მოთხოვნით აქცია გაიმართა 2021 წლის მარტშიც.
