ბათუმის მერის, გიორგი ერმაკოვის განცხადებით, ბათუმის მერია ბულვარს მხოლოდ მას შემდეგ დაიბრუნებს მართვაში, რაც ბათუმის ბულვარში მიმდინარე კაპიტალური პროექტები დასრულდება, არაუადრეს 2016 წლის ბოლომდე.
„მივესალმებით და სწორი გადაწყვეტილებაა აჭარის მთავრობის მხრიდან, სრულად იქნა გათვალისიწინებული საზოგადოების ინტერესი ბათუმის ბულვართან დაკავშირებით. რაც შეეხება მის გადმოცემას ქალაქ ბათუმის მუნიციპალიტეტისათვის, პროცესი იყო დროული და სწორი, მაგრამ ვინაიდან დღეის მდგომარეობით, ბათუმის ბულვარს მართავს აჭარის ფინანსთა და ეკონომიკის სამინისტროს სსიპ-ი, ადმინისტრაციის ცვლილება ამ პროცესში მიზანშეუწონლად მიგვაჩნია, იქედან გამომდინარე რომ აღნიშნული კაპიტალური პროექტები არის შეთანხმებული. ვსაუბრობ ფილების შეცვლაზე, სანიღვრე სისტემის შეცვლაზე, ბორდიურების მოწყობაზე, რომელიც შეთანხმებულია ქალაქ ბათუმის მუნიციპალიტეტთან, გამოცხადებულია ტენდერები და მიმდინარეობს კაპიტალური სამუშაოები. ეს სამუშაოები აუცილებლად უნდა დასრულდეს არსებული მენეჯმენტის პირობებში.
დღესაც რომ შევქმნათ ჩვენ ნებისმიერი სამართლებრივი ფორმით შპს თუ აიპი, ის გამოიწვევს გარკვეულ სამართლებრივ სირთულეებს. ამიტომ დაწყებული პროცესები, ხაზგასმით ვამბობ, რაც მერიასთან არის შეთანხმებული: საკანალიზაციო სისტემის შეცვლა, ფილების მოწყობა, ბორდიურები, სხვა, კომუნალური სისტემების რეაბლიტაცია, უნდა იქნას მიყვანილი ბოლომდე იმ მენეჯმენტის პირობებში.
იმ კონტრაქტორებთან, ვინც ჰყავს ეკონომიკის სამინსიტროს სსიპს, ჩვენ ვერ გავაგრძელებთ შპს-ს თუ აიპის პირობებში სამართლებრივ ურთიერთობას. ეს ნიშნავს, რომ ფილების დაგება უნდა შეწყდეს, გამოცხადდეს ახალი ტენდერები, 5 თვეა დარჩენილი საზაფხულო სეზონამდე და ეს გამოიწვევს ტურისტულ სეზონზე შეფერხებას.
საკრებულოს უახლოეს სხდომაზე მერია შევა წინადადებით სკარებულოში, მიიღოს ნებართვა, ეს იქნება შპს თუ აიპი ბათუმის ბულვარის დაფუძნების თაობაზე, კაპიტალური პროექტების დასრულების შემდეგ ეს განკარგულება შევა ძალაში და ჩვენ მთლიანად შევისწავლით მენეჯმენტს, ბულვარის საჭიროებებს და გავაფორმებთ მემორანდუმს აჭარის ფინანსთა და ეკონომიკის სამინსიტროსთან, არაუგვიანეს 2016 წლის დეკემბრისა, კაპიტალური პროექტების დასრულებაზეა ეს დამოკიდებული. დასრულდეს ეს პროცესი და შემდეგ ბათუმის ბულვარი გადმოეცეს მართვისათვის მთლიანად ბათუმის მუნიციპალტეტს“ – განაცხადა გიორგი ერმაკოვმა.
ბათუმის მერიისთვის ბულვარის დაბრუნების საკითხი აჭარის მთავრობამ 2 თებერვალს გამართულ სხდომაზე განიხილა. სხდომაზე აღინიშნა, რომ ბულვარი მერიას გადაეცემა თავისი ბიუჯეტით, რომელიც აჭარის მთავრობამ მისთვის წლის დასაწყისში გამოყო.
მთავრობის სხდომაზე ითქვა, რომ მთავრობამ ეს გადაწყვეტილება საზოგადოების დაკვეთით მიიღო, მას შემდეგ რაც ბათუმში, ძველ ბულვარში მთავრობის კონცეფცია გააპროტესტეს, რომელიც ბულვარში ალეის გაუქმებას ითვალისწინებდა.
