დღეს, 23 სექტემბერს, საქართველოში გარდაცვლილი 25-ე პაციენტი აჭარიდანაა.
აჭარის ჯანდაცვის სამინისტროს ინფორმაციით, გარდაიცვალა 76 წლის კაცი, რომელიც ბათუმის კლინიკა “მედ ემერჯენსში” (ცხელების ცენტრი) შეყვანილი იქნა 22 სექტემბერს 0:52 საათზე, სასწრაფო დახმარების ბრიგადის მიერ, დიაგნოზით – სუნთქვის მწვავე უკმარისობა, ცხელება.
„პაციენტის მდგომარეობა კლინიკაში შეყვანისთანავე შეფასდა რთულად. პაციენტს ჰქონდა რთული ანამნეზი: გულის იშემიური დაავადება, არტერიული ჰიპერტენზია ESU/ESC 3, ექსტრასისტოლური არითმია, გულის უკმარისობა.
კლინიკაში მაშინვე გატარდა შესაბამისი ღონისძიებები, თუმცა თანმდევი დაავადებების სირთულიდან გამომდინარე, სამწუხაროდ, პაციენტის გადარჩენა ვერ მოხერხდა. გარდაცვალებამდე აღებული იქნა ტესტი კორონავირუსზე, პაციენტს დაუდასტურდა კოვიდ-19“, – აღნიშნულია აჭარის ჯანდაცვის სამინისტროს მიერ გავრცელებულ განცხადებაში.
აჭარის საზოგადოებრივი ჯანდაცვის ცენტრის დირექტორის მოადგილემ, ნონა ეფაძემ ჟურნალისტებთან განაცხადა, რომ ვერ დაადასტურებს ინფორმაციას იმის შესახებ, რომ აღნიშნულ პაციენტს უკვე აღებული ჰქონდა ტესტი კორონავირუსზე. „ეს კვლევის პროცესში გახლავთ“, – განაცხადა მან.
