დღეს, 11 სექტემბერს, გიორგი კირთაძემ, ენმ-ს ბათუმის ორგანიზაციის ხელმძღვანელმა განაცხადა, რომ საოლქო საარჩევნო კომისია საუბნო კომისიებს „ქართული ოცნების“ მხარდამჭერი პირებით აკომპლექტებს მაშინ, როცა კანონი საუბნო კომისიებში პოლიტიკურად ნეიტრალური პირებით დაკომპლექტებას ითვალისწინებს.
მან ბრიფინგის დროს წარმოადგინა რამდენიმე პირის ფეისბუქპროფილის ფოტოები, სადაც აღნიშნული პირები მმართველი პარტიის რეკლამირებას ეწევიან.
ერთ-ერთი ასეთი პირია ვაჟა კურცხალიძე, რომელსაც საუბნო კომისიაში აქვს განცხადება შეტანილი. 30 აგვისტოს ვაჟა კურცხალიძეს თავის პირად ფეისბუქზე გამოქვეყნებული აქვს „ქართული ოცნების“ მაჟორიტარების წარდგენის ფოტოები.
გიორგი კირთაძის თქმით, კიდევ ერთი პირი, რომელსაც ასევე შეტანილი აქვს განცხადება საუბნო კომისიაში, თამარ ჯანელიძეა. მას საკუთარი ფეისბუქის ე.წ. ქავერზე „ქართული ოცნების“ დროშა უყენია. ზვიად თურმანიძეს კი გიორგი გახარიას ფეისბუქის ოფიციალური გვერდი აქვს გაზიარებული.
თამარ ჯანელიძის ფეისბუქის გვერდი
გიორგი კირთაძის განცხადებით, მსგავსი შემთხვევები ბევრია და მას ენმ ეტაპობრივად გააჟღერებს.
ვაჟა კურცხალიძის ფეისბუქის გვერდი
გიორგი კირთაძის თქმით, საოლქო საარჩევნო კომისიაში დღეს, 11 სექტემბერს, საუბნო კომისიებში წევრებს ირჩევენ.
ზვიად თურმანიძის ფეისბუქის გვერდი
„დარწმუნებული ვართ, ამ ადამიანებს აირჩევენ საუბნო კომისიებში. ეს იმას ნიშნავს, რომ საუბნო კომისიები არა ნეიტრალური, არამედ პარტიული ხალხით დაკომპლექტება“, – ამბობს კირთაძე.
