„რაც შეეხება ბათუმის სტადიონს, გუშინ რომ ჩამოვედი ღამით, განათებული იყო, ძალიან მომეწონა…. პირბადით და ორი სკამის გამოტოვებით, თუ დავიცავთ წესს და რიგს, ამას სჭირდება შესაბამისი გადაწყვეტილება. ალბათ შესაბამისი, ისეთი პომპეზური გახსნა ვერ იქნება, მაგრამ მოხდება წესის და რეგულაციის დაცვით,“ – აღნიშნა ამირან გამყრელიძემ, დაავადებათა კონტროლის ეროვნული ცენტრის დირექტორმა დღეს, ბათუმში ჟურნალისტებთან საუბრის დროს. ბათუმში ახალი სტადიონის გახსნა 12 სექტემბერსაა დაგეგმილი.
დღეს, 5 სექტემბერს, სასტუმრო „ჰილტონში“ კორონავირუსის ეპიდსიტუაციასთან დაკავშირებით ჯანდაცვის სფეროს წარმომადგენლები კონფერენციას მართავენ. შეხვედრა ორგანიზებულია გაეროს ბავშვთა ფონდის – იუნისეფი საქართველოს მიერ. შეხვედრას ესწრება დაავადებათა კონტროლის ეროვნული ცენტრის ხელმძღვანელი ამირან გამყრელიძე და საზოგადოებრივი ჯანდაცვის ცენტრების ხელმძღვანელები, ასევე გაეროს ბავშვთა ფონდის წარმომადგენელი საქართველოში ღასან ხალილი.
ამირან გამყრელიძის თქმით, მოსალოდენელი იყო კორონავირუსით დაინფიცირების მაჩვენებლის ზრდა, რადგან შეზღუდვები შესუსტდა. მისივე თქმით, მთავარი ისაა, რომ ახალი შემთხვევები ასობით არ იზრდება.
„ფაქტია, რომ გვაქვს ზრდა, მაგრამ ეს ზრდა იყო პროგნოზირებადი და მოსალოდენელი, შემსუბუქდა ე.წ. შეზღუდვების რეჟიმი… ჩენ გვაქვს ადგილობრივი ტურიზმი და მობილობა არის ერთ-ერთი მთავარი რისკის ფაქტორი. მთავარია, რომ ეს არ იყოს ასეულობით… უმრავლეს შემთხვევაში, ჩვენ წყაროს ვადგენთ და სწორად ვრეაგირებთ,“ – თქვა ამირან გამყრელიძემ.
ამირან გამყრელიძე კორონავირუსის მატებას ელის ნოემბრის შუა რიცხვებში, როცა სეზონური გრიპიც გააქტიურდება. ის საზოგადოებას კიდევ ერთხელ მოუწოდებს პირბადის ტარების, დისტანციის და წესების დაცვისკენ.
