პირბადეს თითქმის აღარავინ ატარებს, მაღაზიაში, ტაქსიში, სამარშუტო ტაქსიში, აფთიაქში და არც სხვაგან. გამოსავალი მოძებნეს საქორწინო დარბაზებმაც – ისინი რესტორნებად გადააკეთეს, სადაც იმართება ქორწილები იმ განსხვავებით, რომ ზოგჯერ პატარძალს სადედოფლო კაბა არ აცვია.
შენობებზე ამ წესის დაცვის აუცილებლობის შესახებ მხოლოდ წარწერებიღა დარჩა, წესი კი თითქმის ყველგან უგულებელყოფილია.
ტაქსების მძღოლებმა [არა ყველამ] კი დაშვებულზე მეტი მგზავრი რომ ჩაისვან, ავტომანქანებს ტაქსის აღმნიშვნელი ტრაფარეტი მოხსნეს. მგზავრების გადაყვანის წესები სხვა მხრივაც დარღვეული აქვთ სამარშუტო ტაქსების მძღოლებს. იმას გარდა, რომ ისინი არც თავად ატარებენ პირბადეს და არც მგზავრებისგან მოითხოვენ ამას, იმაზე მეტი მგზავრი აჰყავთ, ვიდრე ეს დასაშვებია. არაერთ ფოტოს ნახავთ სოციალურ ქსელში, როცა სამარშრუტო ტაქსიში მგზავრების რაოდენობა დასაჯდომი ადგილების რაოდენობას აღემატება.
ამ საკითხზე დღეს გამართულ ბრიფინგზე დაავადებათა კონტროლის ეროვნული ცენტრის დირექტორმა, ამირან გამყრელიძემაც გაამახვილა ყურადღება: „ვამჩნევთ, რომ თანდათან მოვეშვით… დახურულ შენობებში აუცილებელია პირბადის ტარება.“ მან ისაუბრა ასევე ზოგ შემთხვევაში ღია სივრცეში პირბადის ტარების აუცილებლობაზეც და ამ წესის კონტროლის ევროპულ გამოცდილებაზეც გააკეთა აქცენტი:
„დასავლეთ ევროპის ბევრ ქვეყანაში უკვე მეორე ტალღის ტიპის განვითარებაა – საფრანგეთში, ესპანეთში, ასევე, ნაკლებად, მაგრამ არის ზრდის ტენდენცია გერმანიასა და კიდევ რამდენიმე ქვეყანაში, სადაც ტურიზმი განვითარდა. დღეს პირბადის ტარება განიხილება ძალიან მკაცრად, როგორც ერთ-ერთი ყველაზე ძირითადი პრევენციული საშუალების, სავალდებულოდ ტარების აუცილებლობა. ჯარიმა რამდენიმე ასეული ევროს ფარგლებშია აყვანილი.
მე არ ვსაუბრობ ჯარიმებზე აქ. მე ვსაუბრობ თვითშეგნების ამაღლებაზე მოსახლეობაში. საფრანგეთის მთავრობამ განიხილა, ასევე ღია სივრცეებში პირბადის ტარების აუცილებლობა, ვინაიდან, ხაზს ვუსვამ, დაცვის ამაზე უკეთესი საშუალება, ჯერჯერობით, არ არის“, – განაცხადა მან.
https://netgazeti.ge/news/477600/?fbclid=IwAR2FCsuCfyaPTVUV1icsqNmKIV5w9ehSNxsQJySNC-kARbREcgI5JWqj8cY
