24 ივლისის მონაცემებით, საქართველოში ბოლო 24 საათში კორონავირუსის 19 ახალი შემთხვევა გამოვლინდა, განიკურნა ერთი პაციენტი.
თბილისის ინფექციური საავადმყოფოს სამედიცინო დირექტორის, მარინა ეზუგბაიას განცხადებით, ახალი 19 შემთხვევიდან 8 შემთხვევა არის ლილოს ბაზრობიდან, 5 შემთხვევა უკავშირდება გაჩიანის კლასტერს, 2 შემთხვევა იმპორტირებულია, აქედან ერთ-ერთი სატვირთო მანქანის მძღოლია. ასევე, ინფიცირებულია ერთი სამედიცინო პერსონალი, სამი ახალი შემთხვევის ინფიცირების წყარო კი ჯერ უცნობია.
დღეის მონაცემებით, 214 პაციენტი მკურნალობს საქართველოს კოვიდცენტრებში.
სულ საქართველოში კორონავირუსის 1104 შემთხვევაა დადასტურებული, რომელთაგან გამოჯანმრთელდა – 912, ხოლო გარდაიცვალა 16 პაციენტი.
საქართველოს ბაზრებსა და ბაზრობებზე კონტროლი მკაცრდება, ასევე, გარდაბნის მუნიციპალიტეტის სოფელ ყარაჯალაში დღეს საკარანტინო შეზღუდვები ამოქმედდა.
