დღეს, 23 ივლისს, საქართველოს პრემიერ-მინისტრმა, გიორგი გახარიამ განაცხადა, რომ გაჩიანის კლასტერთან დაკავშირებით საქართველოს ბაზრებსა და ბაზრობებზე კონტროლი გამკაცრდება.
„სოციალური სტრუქტურა ამ სოფლების გახლავთ ისეთი, რომ ბევრი ჩვენი მოქალაქე ამ სოფლებიდან შრომობს თბილისის და საერთოდ, ქვეყნის სხვადასხვა ბაზრებზე თუ ბაზრობებზე. ამიტომ, მიღებულია შესაბამისი გადაწყვეტილება, რომ ბაზრებსა და ბაზრობებზე გამკაცრდეს კონტროლი, ეს იქნება თერმოსკრინინგი და ტესტირება, შერჩევითი. ასევე, ამ სოფლებში ჩატარდება აქტიური ტესტირება,“ – განაცხადა პრემიერ-მინისტრმა.
მან ასევე აღნიშნა, რომ სიტუაციის გამწვავების შემთხვევაში, შტაბს მიღებული აქვს დავალება საკარანტინო ზომები სწრაფად გაამკაცროს კონკრეტულ ადგილებში.
გაჩიანის კლასტერი ქვემო ქართლის რეგიონს, გარდაბნის მუნიციპალიტეტს უკავშირდება. გაჩიანის დასახლებაში სამი სოფელი შედის, სადაც კორონავირუსით ინფიცირების 35-ზე მეტი შემთხვევა დადასტურდა. მთავრობის განცხადებით, სწორედ ამ რეგიონიდან მუშაობენ ადამიანები სხვადახვა ბაზრობაზე.
22 ივლისს დაავადებათა კონტროლისა და საზოგადოებრივი ჯანმრთელობის ეროვნული ცენტრის ხელმძღვანელმა ამირან გამყრელიძემ განაცხადა, რომ ახლა საქართველოში ყველაზე „ცხელი წერტილი“ გაჩიანის დასახლებაა.
ამავე თემაზე:
გაჩიანის კლასტერი ყველაზე ცხელი წერტილია – ამირან გამყრელიძე
