დღეს დილიდან ბათუმში 100-მდე მიკროავტობუსის მძღოლი გაიფიცა, ისინი მგზავრობის საფასურის გაზრდას მოითხოვენ.
კორონავირუსის პანდემიის გამო, საზოგადოებრივი ტრანსპორტი გაჩერებული იყო და მუშაობა 20 მაისის შემდეგ განაახლეს. მძღოლები ამბობენ, რომ ფეხზე მდგომი მგზავრების აკრძალვის შემდეგ, მათი შემოსავლები საგრძნობლად შემცირდა.
პანდემიის პირობებში შემოღებული რეგულაციები გამო კი, თანხები მიკროავტობუსებში ლუქის დამაგრებასა და ღია ფანჯრების მოწყობასაც დაჭირდა.
მიკროაბტობუსის მძღოლები გაიფიცნენ
პანდემიამდე, მერიასთან მგზავრობის შეთანხმებული ტარიფი, ხელვაჩაურის მიმართულებით 50 თეთრი იყო, ახლა კი მძღოლები ტარიფის 70 თეთრამდე გაზრდას ითხოვენ.
კომპანია, რომლის დაქვემდებარებაშიც მძღოლები მუშაობენ, ბათუმის მერიამ გუშინ, 5 ივნისს, 100 ლარით დააჯარიმა სანებართვო პირობების დარღვევის გამო, დღეს კი მძღოლები პროტესტის ნიშნად გაიფიცნენ.
გაფიცულ მძღოლებს ბათუმის მერიის საქალაქო ტრანსპორტის განყოფილების უფროსი ემზარ ქავჟარაძე შეხვდა. „რადგან მგზავრთა ნაკადი შემცირდა, ეს შემოსავალზეც აისახა და ამიტომ გვინდა ტარიფის გაზრდაო. თუმცა ტარიფის მატება ასე არ ხდება, უნდა დაწერონ განცხადება და მიმართონ საკრებულოს. საკრებულო იმსჯელებს და როგორ გადაწყვეტილებასაც მიიღებენ, ისე იქნება“-ამბობს ემზარ ქავჟარაძე.
მისი თქმით, გაფიცული მძღოლები მუშაობას განაახლებენ.
ამავე თემაზე:
კომპანია, რომელმაც მგზავრობის საფასური თვითნებურად გაზარდა, მერიამ დააჯარიმა
