ორგანიზაცია „რეპორტიორები საზღვრებს გარეშე“ ეხმიანება აჭარის საზოგადოებრივი მაუწყებლიდან ჟურნალისტისა და ალტერნატიული პროფკავშირის თავმჯდომარის, მალხაზ რეხვიაშვილის გათავისუფლებას.
„გაათავისუფლეს თავისი კოლეგის წინააღმდეგ დისციპლინური სანქციების კრიტიკის გამო! „რეპორტიორები საზღვრებს გარეშე“ გმობს მალხაზ რეხვიაშვილის უსაფუძვლო გათავისუფლებას აჭარის ტელევიზიიდან და მოუწოდებს მმართველ პარტიას, „ქართულ ოცნებას“, შეწყვიტოს პოლიტიკური ზეწოლა მაუწყებელზე“, – წერს „რეპორტიორები საზღვრებს გარეშე“ ტვიტერზე გამოქვეყნებულ განცხადებაში.
#Georgia: fired for having criticized disciplinary sanctions against his colleague! @RSF_inter denounces baseless dismissal of Malkhaz Rekhviashvili from @ajaratelevision and calls on the ruling party #GeorgianDream to stop political pressure on public TV. pic.twitter.com/r6vXqjhGXy
— RSF in English (@RSF_en) May 13, 2020
საზოგადოებრივი მაუწყებლის აჭარის ტელევიზიიდან და რადიოდან გადაცემა „ჰეშთეგის“ წამყვანი, ალტერნატიული პროფკავშირის თავმჯდომარე მალხაზ რეხვიაშვილი 11 მაისს გაუშვეს. მისი სამსახურიდან გათავისუფლების მიზეზი 21 აპრილს ფეისბუქზე დაწერილი სტატუსი გახდა, რომლითაც მან თავის კოლეგას, თეონა თურმანიძეს მხარი დაუჭირა.
„რეპორტიორები საზღვრებს გარეშე“ უკვე მეოთხედ ეხმიანება აჭარის საზოგადოებრივ მაუწყებელში ახალი დირექტორის, გიორგი კოხრეიძის მოსვლის შემდგომ განვითარებულ მოვლენებს. ახალი დირექტორი რამდენიმე თვეა ათავისუფლებს ან პოზიციას უცვლის მისთვის არასასურველ ჟურნალისტებს.
