ამ შაბათ-კვირას ბათუმის ბაზარში და მიმდებარე ქუჩებზე ჩვეული ხალხმრავლობა აღარ არის.
4 აპრილს ბათუმში დაიკეტა ბაზარი და მიმდებარე ქუჩებზე არსებული ღია ბაზრობებისა და საბითუმო ვაჭრობის ობიექტების უმრავლესობა. ადგილი, რომელსაც ყოველ დღე და განსაკუთრებით შაბათ-კვირას უამრავი ბათუმელი აკითხავდა ხილის, ბოსტნეულის, ყველისა და სხვა პროდუქტის შესაძენად, ახლა თითქმის ცარიელია. ნახავთ მხოლოდ რამდენიმე ადგილს, სადაც ხილ-ბოსტნეულის შეძენას შეძლებთ. ტერიტორიაზე ღიაა სასურსათო მაღაზიები.
ბაზრის ყველა ჭიშკარი ჩაკეტილია. დახურულია ბაზრის მიმდებარედ არსებული მაღაზიების უმრავლესობა.
ახლა ბაზრის შესასვლელთან მხოლოდ პურის ყიდვა შეიძლება პატარა მაღაზიებში.
დაცარიელებული ყვავილების ბაზრობა ბათუმის აგრარული ბაზრის შესასვლელთან, სადაც ათობით ადამიანი წლებია ყვავილებით ვაჭრობს. ახლა ყვავილები არავის სჭირდება.
„დროებით არ ვმუშაობთ“ – დაკეტილია პატარა სახაჭაპურე ბაზრის შესასვლელში.
ბაზრის წინ მდებარე ქუჩაზე, სადაც ხილ-ბოსტნეულს ყიდდნენ, დახლები ალაგებულია.
ახლა აქ ვერც კარტოფილს და სხვა ბოსტნეულს იყიდით, ვერც მწვანილს და ვერც ხილს.
ცარიელ დახლებზე ნახავთ რამდენიმე აბრას წარწერით – „ვყიდი კარტოფილს“, სადაც ტელეფონის ნომერია მითითებული.
დაკეტილია საბითუმო ვაჭრობის ობიექტების უმეტესობა
კანტიკუნტად შეხვდებით ღია მაღაზიებსა და საბითუმო ვაჭრობის წერტილებს
ბაზრის ტერიტორიაზე მცხოვრებ ათობით ქუჩის ძაღლს შიმშილი ემუქრება, რადგან ბაზარი დაკეტილია, ხალხი არ გადაადგილდება და უპატრონო ცხოველებისთვის საკვების მიმწოდებელი არავინაა.
