ბათუმის სამედიცინო დაწესებულებებში შესვლა პაციენტების თანმხლები პირებისთვის და მნახველებისთვის შეზღუდულია. აჭარის ჯანდაცვის სამინისტროში გვითრეს, რომ ახალი კორონავირუსის პრევენციის მიზნით, კლინიკებმა შეზღუდვები ინდივიდუალურად დააწესეს.
ბათუმის საუნივერსიტეტო კლინიკაში [ბაუ] არ უშვებენ პაციენტის თანმხლებ პირებს, პაციენტებს კი შენობის შესასვლელშივე უზომავენ სიცხეს და ხელებს სპეციალური ხსნარით უმუშავებენ.
„თუ კონსულტაციაზე მოსულ მოქალაქეს დაუფიქსირდა ტემპერატურა, მას უკეთდება ნიღაბიც და ისე შედის ექიმთან. კლინიკაში საერთოდ არ დაიშვებიან მნახველები. თუ პაციენტის მდგომარეობა აინტერესებს ახლობელს, უშუალოდ ექიმი ჩამოდის ფოიეში და იქ ხდება შეხვედრა. ხოლო, თუ რაიმე გადასაცემი აქვთ პაციენტისთვის, ამას დაცვის თანამშრომლები უზრუნველყოფენ. ასევე, თუ ვინმე გაეწერება კლინიკიდან, მასთან გარეშე პირი არავინ შედის და მედპერსონალს ჩამოჰყავს,“ – გვითხრეს ბაუში.
პრევენციის მიზნით გარკვეული შეზღუდვებია ბათუმის რეფერალურ და ბავშვთა საავადმყოფოებშიც. აქ შესაძლებელია პაციენტების და მნახველების მხოლოდ ციფრული კომუნიკაცია, შემუშავებულია პაციენტების გადაადგილებისა და მართვის პროტოკოლები.
_________________
„ყველაზე დიდი რისკზონები არის სამედიცინო დაწესებულებები“ – ეს განცხადება გუშინ აჭარის ჯანდაცვის მინისტრმა, ზაალ მიქელაძემ გააკეთა „ბათუმელებთან“.
„კლინიკებში სხვა დიაგნოზით მწოლიარე პაციენტებთან, ტრადიციულად გვახასიათებს, რომ დღეში ათმა ნათესავმა უნდა მოინახულოს. მსგავსი რამ არ დაიშვება და ნუ შევლენ კონფლიქტში კლინიკებთან ამის გამო. ბოლო სამი დღის მანძილზე 200-ზე მეტი ზარი მქონდა, მინისტრი ხარ და სთხოვე, შემიშვანო. არათუ არ ვთხოვ, არამედ კატეგორიულად ვავალებ, რომ არ დაიშვას ასეთი ნახვები კლინიკაში. ერთი პირი, ოჯახის ახლობელი აბსოლუტურად საკმარისია, თუ რაიმეს მიწოდება უნდა პაციენტს, ან ინფორმაციის გამოტანა. ყველაზე დიდი რისკზონები არის სამედიცინო დაწესებულებები და ნუ მიმართავენ მათ უმიზეზოდ,“ – განაცხადა მინისტრმა.
ამ თემაზე:
https://batumelebi.netgazeti.ge/news/260921/
18 მარტის დილის მონაცემებით საქართველოში კორონავირუსის დადასტურებული შემთხვევების რაოდენობაა – 38, კარანტინის რეჟიმშია – 1130, სტაციონარში მეთვალყურეობის ქვეშ რჩება – 81 პაციენტი. აქედან ერთი პაციენტი, რომელიც COVID-19-სგან განიკურნა, ინფექციური საავადმყოფოდან 16 მარტს გაწერეს.
