სახელმწიფო შესყიდვების სააგენტოს ინფორმაციით, 2018 წელს შემსყიდველი ორგანიზაციების მიერ საქონლის, მომსახურებისა და ინფრასტრუქტურული სამშენებლო სამუშაოების სახელმწიფო შესყიდვის მიზნით, ჯამში, 4 მილიარდ ლარზე მეტი დაიხარჯა.
აქედან ელექტრონული პროცედურებით განხორციელდა 3,3 მილიარდი ლარის შესყიდვები, ხოლო გამარტივებული შესყიდვების გზით გაფორმებული ხელშეკრულებების ღირებულებამ 778 მილიონ ლარზე მეტი შეადგინა.
მთელი ქვეყნის მასშტაბით, იმ 10 სახელმწიფო ორგანიზაციას შორის, რომელთა მიერ შარშან გამოცხადებული ტენდერების ჯამური ღირებულება ყველაზე მეტი იყო, შპს „სტადიონი“ მე-6 ადგილზეა, ხოლო აჭარის გზების დეპარტამენტი – მე-8 ადგილზე.
შპს „სტადიონმა“, რომლის 100% წილის მფლობელი აჭარის ავტონომიური რესპუბლიკაა, 2018 წელს 10 ტენდერი გამოაცხადა. საწყისი სატენდერო [სავარაუდო] ღირებულება კი ჯამში 69,1 მილიონი ლარი იყო;
აჭარის საავტომობილო გზებისა და სამელიორაციო სისტემების მართვის დეპარტამენტმა კი გასულ წელს 283 ტენდერი გამოაცხადა – საწყისი სატენდერო [სავარაუდო] ღირებულებით, ჯამში – 56,8 მილიონი ლარით.
2018 წელს სახელმწიფო ორგანიზაციებმა სულ 32 597 ტენდერი გამოაცხადეს [2017 წელს კი უფრო მეტი – 33 095 ტენდერი]
სახელმწიფო შემსყიდველი ორგანიზაციები 2018 წელს გამოცხადებული ტენდერების ჯამური სავარაუდო ღირებულების მიხედვით
შემსყიდველი ორგანიზაციები 2018 წელს გამოცხადებული ტენდერების ჯამური სავარაუდო ღირებულების მიხედვით / წყარო: შესყიდვების სააგენტო
