ხულოში არჩევნები მას შემდეგ დაინიშნა, რაც პირდაპირი წესით არჩეული მერი გოჩა მელაძე 2018 წლის 17 ოქტომბერს თანამდებობიდან გადადგა.
არასამთავრობო ორგანიზაცია „სამართლიანი არჩევნები“ ხულოში მიმდინარე მერის არჩევნებს მობილური ჯგუფების საშუალებით აკვირდება. ორგანიზაციამ სულ სამი საჩივარი დაწერა ხულოში. რეგიონალური კოორდინატორის, მადონა ბერიძის თქმით, საჩივრები, ძირითადად, პროცედურულ დარღვევებს ეხება.
„დაფიქსირდა რიგი პროცედურული დარღვევები, რასთან დაკავშირებითაც იქნა მიცემული შენიშვნები საუბნო საარჩევნო კომისიის წევრების მისამართით და გარკვეულ შემთხვევებში მოხდა დარღვევების აღმოფხვრა და რეკომენდაციების გათვალისწინება.
ორგანიზაციის მიერ ამ დროისათვის დაწერილია სამი საჩივარი. ერთი საჩივარი ეხება იმას, რომ ხელმოწერების რაოდენობა ნაკლები იყო ერთ-ერთ უბანზე ვიდრე გაცემული ბიულეტენები; ერთ უბანზე, სადაც საჩივარი დაიწერა, გადასატანი საარჩევნო ყუთის ამომრჩეველთა მონაცემები არ იყო მითითებული ერთიან სიაში, რომ ამომრჩეველი არის გადასატანი ყუთის სიაში და ასევე, გვქონდა შემთხვევა, როცა ერთ-ერთ უბანზე საუბნო საარჩევნო კომისიის წევრი აღრიცხავდა უბანზე მისულ ამომრჩევლებს“ – ამბობს მადონა ბერიძე.
_________
ფოტოზე: არჩევნები ხულოში. ფოტო: „ბათუმელები“, ცაგო კახაბერიძე
