ავტორი: ნანა ცეცხლაძე, ნესტან ზოიძე
ბათუმში, ბულვარის შესასვლელთან, კვადროციკლების მესაკუთრები აქციას აგრძელებენ. „ვითხოვთ რეგულაციებს“, „ვინ დაიცავს ჩვენს უფლებებს“, „ნუ აგვიკრძალავთ საარსებო წყაროს“ – ამ წარწერებს ბულვარის შესასვლელთან გაშლილ კარვებზე ნახავთ.
აქციის მონაწილეები ამბობენ, რომ შიმშილობენ და საპროტესტო აქციას არ შეწყვეტენ, სანამ მთავრობა მათ ხელსაყრელ პირობებს არ შესთავაზებს. ისინი არ არიან თანახმა მთავრობის მიერ შეთავაზებულ წინადადებაზე – გადავიდნენ აეროპორტის მიმდებარე ტერიტორიაზე სამუშაოდ.
„ჩვენ ვმუშაობთ ტურისტებზე, აქედან გამომდინარე ვერ დავთანხმდებით, იქ არ არიან ტურისტები, არ გვექნება საშუალება ვიმუშაოთ. ეს არ არის დახმარება, ეს უპასუხისმგებლობა“ – გვითხრა აქციის ერთ-ერთმა მონაწილემ, პაატა საგინაძემ.
მან გვითხრა, რომ მთავრობა და ბულვარის ადმინისტრაცია მათ რეგულაციებს არ სთავაზობს – „პირიქით, ჩვენ რისი საშუალებაც გვაქვს ყველაფერი შევთავაზეთო“ – ამბობს.
„ჩვენ ვთმობთ ელექტრომობილებს, ვამცირებთ სიჩქარეს, არასრულწლოვნებს არ დავსვამთ საჭესთან… ეს არის ტურისტისთვის მოსახერხებელი ტრანსპორტი და რატომ გვიკრძალავენ. სანამ სამართლიანად არ გადაწყდება ეს ყველაფერი მანამდე ვიშიმშილებთ“ – ამბობს პაატა საგინაძე.
ბულვარის ტერიტორიაზე 1200-მდე კვადროციკლი მოძრაობდა. მათი მეპატრონეები ამბობენ, რომ თუკი მუშაობის გაგრძელების უფლებას მისცემენ, კვადროციკლების რაოდენობას 300-მდე შეამცირებენ.
კვადროციკლების მეპატრონეების აქცია
კვადროციკლების მეპატრონეების აქცია
კვადროციკლების მეპატრონეების აქცია
