ოზურგეთის მუნიციპალიტეტის დაბა ურეკში ბულვარის და მისი მიმდებარე ქუჩების, ასევე, ბულვარზე გასასვლელების მოწყობისა და რეკონსტრუქციისთვის სახელმწიფო ბიუჯეტიდან 5 მილიონზე მეტი ლარი დაიხარჯება. შესაბამისი სამუშაოების შესყიდვაზე ტენდერი საქართველოს მუნიციპალური განვითარების ფონდმა გამოაცხადა. შესყიდვის სავარაუდო ღირებულება 5 627 316 ლარია.
პროექტი მოიცავს ურეკის ბულვარისა და მისი მიმდებარე ტერიტორიის, ე. თაყაიშვილის ქუჩისა და ასევე, ბულვარის
პარალელური ქუჩის სამშენებლო სამუშაოებს. მოეწყობა ბორდიურები, ტროტუარი, სავალი ნაწილი ორივე მხარეს ფილაქნით, ახალი სანათები მთელს ქუჩაზე. გარე განათების სრულიად ახალი სისტემა.
რაც შეეხება თავად სანაპირო ზოლს ანუ ბულვარს – მოეწყობა ცენტრალური შესასვლელი [საჩრდილობლით]; ფეხით მოსიარულეთა ბილიკი და ველობილიკი; მთავარი მოედანი [მოსასვენებელი ზონა საჩრდილობლებით]; სველი წერტილები, რომლებიც ადაპტირებული იქნება შშმ პირთათვის; ბულვარის მთელს სიგრძეზე მცირე მოედნები ღია სეზონური კაფეებისთვის და კომერციული ობიექტებისათვის.
განხორციელდება ე. თაყაიშვილის ქუჩისა და ბულვარის დამაკავშირებელი გასასვლელების რეკონსტრუქცია; მოეწყობა მცირე არქიტექტურული ფორმები და ბულვარის ინვენტარი; რეკრეაციული ზონები; ბავშვთა გასართობი მოედნები/ზონები სპორტული აქტივობებისთვის, სანაპირო ზოლის მთელს სიგრძეზე.
პროექტით გათვალისწინებულია ასევე დეკორატიული გამწვანებისა და მოსასვენებელი ზონების, ველოსიპედების გასაქირავებელი ადგილის, პარკინგის და გაჩერებების მოწყობა.
სამუშაოები ტენდერში გამარჯვებულთან ხელშეკრულების გაფორმებიდან 10 თვის განმავლობაში უნდა შესრულდეს, თუმცა, როგორც ტენდერის პირობებშია მითითებული „აღნიშნული ვადა არ შეიცავს ურეკისთვის სეზონურად ყველაზე მეტად დატვირთულ თვეებს ივლისს და აგვისტოს. შესაბამისად სამუშაოების სრულად მიწოდება უნდა დასრულდეს ხელშეკრულების დადებიდან 12 კალენდარული თვის ვადაში“.
ტენდერში წინადადებების მიღება 2019 წლის 23 აპრილს სრულდება.
ურეკი / 2018 წ. / ფოტო: „ბათუმელების“ არქივიდან
