აჭარის ტურიზმის დეპარტამენტი ჭვანის ხეობის ტურისტული განვითარების გეგმაზე მუშაობს, რომლის მიზანია შუახევის მუნიციპალიტეტში ახალი, საინტერესო ტურისტული მიმართულების ჩამოყალიბება, ეკოტურიზმის, სოფლის ტურიზმისა და ხეობის კულტურულ-ეთნოგრაფიული ღირებულების პოპულარიზაცია.
ჭვანის ხეობის ტურისტული განვითარების გეგმა ტერიტორიის განვითარების დეტალური კონცეფციისა და ტერიტორიის სივრცითი განვითარების გენერალური გეგმის მომზადებას ითვალისწინებს.
ტურიზმის დეპარტამენტის ინფორმაციით, განვითარების გეგმაში აისახება კულტურული მემკვიდრეობის ძეგლის, ხაბელაშვილების თაღოვანი ხიდის მიმდებარე ტერიტორია, საიდანაც ძირითადი ტურისტული ბილიკი და ინფრასტრუქტურა წისქვილების სოფლამდე უნდა მოეწყოს.
როგორც ტურიზმის დეპარტამენტში განმარტავენ, წელს მომზადდება განვითარების გეგმა, მომავალ წელს კი დაიწყება უშუალოდ ინფრასტრუქტურული სამუშაოები, რომლებიც 2021 წელს დასრულდება.
ჭვანის ხეობაში მარკირება და მარშრუტის რუკის მომზადება წელს იგეგმება, ეს ადგილი ტურისტებისთვის ახალი მარშრუტი იქნება.
ფოტო: აჭარის ტურიზმის დეპარტამენტი
