ბათუმის მერიამ შვიდ ვაკანტურ პოზიციაზე კონკურსი გამოაცხადა. კონკურსი სამეტაპიანია და ის წარდგენილი დოკუმენტების გადარჩევის შემდეგ ტესტირებას და შემდეგ საკონკურსო კომისიასთან გასაუბრებას ითვალისწინებს. შვიდივეს მერია ერთწლიანი გამოსაცდელი ვადით აიყვანს.
ვაკანტურია მუნიციპალური პოლიტიკის სამსახურის, რისკების მართვისა და მონიტორინგის განყოფილების მესამე კატეგორიის უფროსი სპეციალისტის თანამდებობა – ჯანდაცვისა და სოციალური უზრუნველყოფის საკითხებში. ხელფასი 1300 ლარია. პრეტენდენტს უნდა ჰქონდეს მუშაობის ერთწლიანი გამოცდილება. ფლობდეს კომპიუტერულ პროგრამებს და ინგლისურს B1 დონეზე.
საკონკურსო თემატიკა შეირჩევა საქართველოს კანონმდებლობიდან: მითითებულია საქართველოს კონსტიტუცია, საქართველოს ორგანული კანონი, ადგილობრივი თვითმმართველობის კოდექსი, საჯარო სამსახურის შესახებ საქართველოს კანონი, საქართველოს ზოგადი ადმინისტრაციული კოდექსი და კიდევ რამდენიმე კანონქვემდებარე აქტი.
ვაკანტურია, ასევე, მუნიციპალური პოლიტიკის სამსახურის, მუნიციპალური პოლიტიკის დაგეგმვის – რისკების მართვისა და მონიტორინგის განყოფილების მესამე კატეგორიის უფროსი სპეციალისტის თანამდებობა – არქიტექტურისა და ურბანული განვითარების საკითხებში. ხელფასი ამ შემთხვევაშიც 1300 ლარია. საჭიროა ერთწლიანი გამოცდილება, კომპიუტერული პროგრამებისა და ინგლისური ენის B1 დონეზე ცოდნა.
მერია კონკურსის წესით შეარჩევს მუნიციპალური ქონების და სერვისების მართვის სამსახურის მუნიციპალური ქონების პოლიტიკის და განკარგვის განყოფილების მეორე კატეგორიის უფროს სპეციალისტსაც, ხელფასი ამ პოზიციაზე 1400 ლარია. მოთხოვნები თითქმის იგივეა. გარდა ამისა, პრეტენდენტს უნდა ჰქონდეს ეკონომისტის განათლება.
მერია ეკონომისტს ან ფინანსისტს აიყვანს ასევე საფინანსო-საბიუჯეტო სამსახურის საბუღალტრო აღრიცხვა-ანგარიშგების განყოფილების მეორე კატეგორიის უფროსი სპეციალისტის თანამდებობაზე.
კონკურსია გამოცხადებული ასევე მერიის ადმინისტრაციის საქმისწარმოების განყოფილების მეორე კატეგორიის უფროსი სპეციალისტის თანამდებობაზე – ხელფასი 1400 ლარი.
გამარტივებული კონკურსია გამოცხადებული სპეციალისტის შესარჩევად ახალგაზრდულ განყოფილებაში, ამ პოზიციაზე ხელფასი 900 ლარია.
