„განათლების სფეროს უაზრო რეგულაციები,“ – ასე ჰქვია გამოკითხვას, რომელსაც განათლების რეფორმის ბლოგი ახორციელებს. ინიციატივა ეკუთვნის განათლების სპეციალისტ სიმონ ჯანაშიას, რომელიც ამავე დროს არის განათლების რეფორმის ბლოგის ავტორიც.
როგორც სიმონ ჯანაშია „ბათუმელებთან“ ამბობს, ბლოგის შექმნის მიზანია, შეგროვდეს კონკრეტული მაგალითები იმ რეგულაციების შესახებ, რომლებიც ხელს უშლის სისტემას განვითარებაში, შემდეგ კი ბლოგები გამოქვეყნდება და დაიწყება მისი საჯარო განხილვა.
„პირველივე დღეებში უკვე იყო გამოხმაურება, რამდენიმე ადამიანს გრძელი სია ჰქონდა ჩამოწერილი იმ რეგულაციების, რასაც ისინი ზედმეტ შეზღუდვად მიიჩნევენ სკოლებისთვის. იყო რამდენიმე მაგალითი უნივერსიტეტზე, თუმცა ძირითადი აქცენტი მაინც სკოლაზე კეთდება,“ – გვეუბნება სიმონ ჯანაშია.
მისი თქმით, ბლოგის მიზანია დაეხმაროს საზოგადოებას ქვემოდან წამოსული მოთხოვნების ფორმირებაში. „ჩვენთან განათლების პოლიტიკა, ძირითადად, ზემოდან წამოსული ინიციატივებია. ამიტომ, პირველ ეტაპზე, გვინდა შევაგროვოთ „უაზრო რეგულაციების“ მაგალითები, ვნახოთ რომელი რეგულაციაა ყველაზე პრობლემური, შემდეგ კი ამ ბლოგებს გამოვაქვეყნებთ და ვიმსჯელებთ იმაზე, რა უნდა შეიცვალოს ვითარების გასაუმჯობესებლად, როგორი უნდა იყოს ალტერნატივა. პოლიტიკის ფორმირებაზე კი ცალკე ნაბიჯები უნდა გადაიდგას“.
ჯანაშიას თქმით, ბლოგებში ადამიანები საუბრობენ იმ ტიპის უაზრო რეგულაციებზე, როგორიცაა, მაგალითად, სკოლებში სახელმძღვანელოებთან დაკავშირებული შეზღუდვები, რადგან მხოლოდ გრიფირებული სახელმძღვანელოების გამოყენების ვალდებულება არსებობს, შეხვედრების რეგლამენტირება, დამოკიდებულება – როცა სახელმწიფო არ ენდობა სკოლას და ფიქრობს, რომ „სუსტი სკოლა რეგულაციის გარეშე წინდაუხედავ ნაბიჯებს გადადგამს“…
სიმონ ჯანაშიას თქმით, ამ თემების საჯარო განხილვა და მსჯელობა ალტერნატივების შემოღებაზე სახელმწიფოსაც დააფიქრებს.
როგორც განათლების რეფორმის ბლოგზეა აღნიშნული, კონკურსის შემდეგ გამოვლინდება უაზრო რეგულაციების „საუკეთესო“ ხუთეული. „შესაძლოა ყველაზე უაზრო რეგულაციის პრიზიც კი დაწესდეს, რომელიც მის შემმუშავებელ ორგანოს გადაეცემა“.
გამოკითხვაში მონაწილეობის მისაღებად გადადით ამ ბმულზე.
