ბათუმის რუსთაველის სახელობის სახელმწიფო უნივერსიტეტში მიმდინარე სამეცნიერო-კვლევითი პროექტების შესარჩევი კონკურსის გამარჯვებულები უკვე ცნობილია. კონკურსში წარდგენილი 32 პროექტიდან საკონკურსო კომისიამ 10 პროექტი აარჩია. პროექტების განსახორციელებლად უნივერსიტეტის ბიუჯეტიდან 180 ათასი ლარი დაიხარჯება.
კონკურსი ექვს მიმართულებაზე იყო გამოცხადებული – ინჟინერიის, ტექნოლოგიებისა და აგრარულის, ეკონომიკისა და ბიზნესის, ჰუმანიტარული მეცნიერებების, საბუნებისმეტყველო, სოციალური მეცნიერებებისა და ინტერდისციპლინარული კვლევების მიმართულებით.
ბათუმის შოთა რუსთაველის სახელმწიფო უნივერსიტეტის რექტორის მოადგილე, ნათია წიკლაშვილი ამბობს, რომ კონკურსის ყველა გამარჯვებული პროექტი ექვსივე მიმართულებისთვის ცალ-ცალკე შექმნილმა საკონკურსო კომისიებმა შეარჩიეს. კომისიები კი კვალიფიციური კადრებით იყო დაკომპლექტებული. თითოეულ პროექტში გასაცემი მაქსიმალური საგრანტო თანხა 20 ათასი ლარი იყო.
„პირველ ეტაპზე სრულად ვერ მოხერხდა გამოყოფილი თანხის ათვისება. ამიტომ მაღალი შეფასების მქონე პროექტები, რომლებიც პირველ ადგილზე ვერ გავიდნენ, მაგრამ კომისიებმა მაღალი ქულებით შეაფასეს, განმეორებით კონკურსში მიიღეს მონაწილეობა. შევქმენით გაერთიანებული კომისია, რომელთაც განიხილეს ეს პროექტები და გამარჯვებულები გამოავლინეს,“ – უთხრა „ბათუმელებს“ ნათია წიკლაშვილმა.
სამეცნიერო-კვლევით პროექტებზე უნივერსიტეტი გრანტებს მესამე წელია გასცემს. წლევანდელი გამარჯვებული პროექტების ნუსხა შეგიძლიათ იხილოთ აქ.
