ბათუმის მერიამ ბათუმის მუნიციპალური ტრანსპორტის ტარიფების ფასდაკლების სისტემა დააზუსტა. ამ დრომდე ბათუმის საკრებულოს დადგენილების შესაბამისად, შეღავათებით სარგებლობდნენ: მოსწავლეები, რომლებიც სწავლობდნენ ბათუმში არსებულ სკოლებში და პედაგოგები, რომლებიც ასწავლიდნენ ბათუმში არსებულ სკოლებში, მიუხედავად მათი რეგისტრაციის ადგილისა.
ცვლილების მიხედვით, რომელიც საკრებულომ დღეს დაამტკიცა, მოსწავლეები და პედაგოგები შეღავათით ისარგებლებენ იმ შემთხვევაშიც, თუ ისინი რეგისტრირებულნი არიან ბათუმში და სწავლობენ ან ასწავლიან სხვა მუნიციპალიტეტში.
საკითხის მომხსენებლის, მერიის საფინანსო სამსახურის უფროსის, არჩილ ვანაძის განმარტებით, ცვლილება დადგენილებაში დამატებითი ხარჯების გაწევას ბიუჯეტიდან არ გამოიწვევს.
საკრებულოს დადგენილება ბათუმში რეგისტრირებული მოსწავლეების უფასოდ მგზავრობას, ხოლო პედაგოგების 15 თეთრად მგზავრობას ითვალისწინებს.
