აჭარაში ოლქებმა საუბნო კომისიებში წარმომადგენლები აირჩიეს

ბათუმის, ქედის, შუახევის, ხულოს, ქობულეთის და ხელვაჩაურის საოლქო საარჩევნო კომისიებმა საარჩევნო უბნებზე მათ მიერ დასანიშნი ექვსწევრიანი ჯგუფი დააკომპლექტეს.

ქედის #80 საარჩევნო ოლქის თავმჯდომარის, ალი ნაკაშიძის ინფორმაციით, ქედის საარჩევნო ოლქმა 31-ვე უბანზე კომისიის ექვსი წევრი შეარჩია, ქედის საარჩევნო ოლქის თავმჯდომარე ალი ნაკაშიძე  კომისიის წევრების შერჩევას ობიექტურად აფასებს.

„ყველა უბანზე ექვსზე მეტი განაცხადი იყო შემოსული, კომისიის წევრების არჩევა ობიექტურად ჩატარდა, აქცენტი გამოცდილ და კვალიფიციურ კადრებზე გაკეთდა,“ – ამბობს ალი ნაკაშიძე.

2017 წლის თვითმართველობის არჩევნებზე ქედაში სულ 31 საარჩევნო უბანი გაიხსნება.

49 უბანი გაიხსნება შუახევის #82 საარჩევნო ოლქში. შუახევის ოლქის თავმჯდომარის, დათა ზოიძის ინფორმაციით, რვა უბანზე კომისიის ექვსი წევრის შესარჩევად კომისიას არჩევანი არ ჰქონდა, რადგანაც: „უბანზე ექვსზე მეტი განაცხადი არ იყო შემოსული, შესაბამისად, როდესაც ექვს განაცხადზე მეტი არ შემოდის, არჩევანი არის ის,  აირჩიო ვისი განაცხადიც შემოდის. ორმოცდაცხრავე უბანზე ავირჩიეთ კომისიის ექვსი წევრი, 294 ვაკანტურ ადგილზე სულ 399 განაცხადი შემოვიდა“.

დათა ზოიძის ინფორმაციით, საოლქო კომისიამ საუბნო კომისიის წევრების შერჩევისას აქცენტი გამოცდილ კადრებზე შეაჩერა.

„არჩევნების ჩატარება განსაკუთრებულ სიზუსტეს მოითხოვს, კომისიის წევრების შერჩევისას აქცენტი ისეთ წევრებზე გავაკეთეთ, რომლებიც კარგად იცნობდნენ არჩევნებს და ამ კუთხით სამუშაო გამოცდილება ჰქონდათ“ – ამბობს დათა ზოიძე

ხულოს #84 საარჩევნო ოლქში, თვითმმართველობის არჩევნებზე 54 საარჩევნო უბანი გაიხსნება. ოლქის თავმჯდომარის, ნოდარ მელაძის ინფორმაციით: „54 უბანზე სულ 404 განაცხადი შემოვიდა, 17 საარჩევნო უბანზე 6 განაცხადი იყო შემოსული, დანარჩენ უბნებზე არჩევანი დიდი იყო“ .

რაც შეეხება ქობულეთის #81 და ხელვაჩაურის #83 საარჩევნო ოლქებს, 2017 წლის თვითმმართველობის არჩევნებზე ქობულეთში 65, ხოლო ხელვაჩაურში 46 საარჩევნო უბანი გაიხსნება. შუახევისა და ხულოს ოლქების მსგავსად, ხელვაჩაურის საარჩევნო ოლქში, 12 საარჩევნო უბანზე ექვსზე მეტი განაცხადი არ შესულა.

საოლქო კომისიების მიერ საუბნო კომისიის წევრების არჩევნებს აჭარაში არასამთავრობო ორგანიზაცია „სამართლიანი არჩევნები“ აკვირდებოდა. ორგანიზაციის კოორდინატორის, აჭარა, გურიასა და ფოთში, მადონა ბერიძის შეფასებით, საოლქო კომისიებმა საუბნო კომისიის წევრებად წინასწარ შერჩეული კანდიდატები შეარჩიეს.

„ყველაზე მნიშვნელოვანია ის, რომ ოლქს წინასწარ უნდა ჰქონდეს კრიტერიუმები განსაზღვრული, რითაც გადაწყვეტილების მიღებისას იხელმძღვანელებს. ასევე მნიშვნელოვანია ღია იყოს გადაწყვეტილებები, როგორც გასული წლის საპარლამენტო არჩევნებზე,  წელსაც საარჩევნო ოლქებს გადაწყვეტილებები წინასწარ ჰქონდათ მიღებული.  საოლქოს მიერ, საუბნო კომისიის წევრების შერჩევისას აჭარის ყველა მუნიციპალიტეტში უმთავრესი ეს ორი პრინციპი დაირღვა, საერთო სიაში მონიშნული ჰქონდათ კანდიდატები, რომლებისთვისაც ხმა უნდა მიეცათ და საუბნო კომისიის წევრების არჩევისას ამ სიებით ხელმძღვანელობდნენ. კომისიის შვიდი წევრი, მათ შორის „ოცნების“ წარმომადგენლის გადაწყვეტილება ზუსტად ემთხვეოდა ერთმანეთს, რაც მიანიშნებდა იმას, რომ სხდომა ერთგვარად ფორმალობა იყო. იქედან გამომდინარე, რომ სიები, რითაც საოლქო კომისიის წევრები საუბნო კომისიის წევრების შერჩევისას ხელმძღვანელობდნენ და სადაც წინასწარ ჰყავდათ კანდიდატები მოხაზული, პერსონალური ინფორმაციის შემცველია, რის გადაღება და გასაჯაროება კანონით აკრძალულია, შესაბამისად, ჩვენ ამის ამსახველი ფოტომასალა არ მოგვეპოვება,“ – აცხადებს მადონა ბერიძე.

„ბათუმელების“ კითხვაზე,  39 საარჩევნო უბანზე 6-ზე მეტი განაცხადის არარსებობა, საოლქო კომისიების მიერ, საუბნო კომისიის წევრთა არჩევის დამკვიდრებულ ტენდენციებზე ხომ არ მიუთითებს? – მადონა ბერიძე პასუხობს – „წლების განმავლობაში კონკურსისადმი ასეთმა დამოკიდებულებამ გარკვეული ნიჰილისტური დამოკიდებულება გაუჩინა ადამიანებს და არ იღებენ მონაწილეობას კონკურსში. გასული წლის არჩევნებზე, მაშინ, როდესაც საუბარი იყო წინასწარ სიებზე, ეს სიები შემდეგ არჩეულ კანდიდატებს დაემთხვა“.

საოლქო კომისიის თავმჯდომარეების ინფორმაციით, საუბნო კომისიის ექვსი წევრის შერჩევასთან დაკავშირებით ოლქებში საჩივარი არ დაწერილა.

მადონა ბერიძე: „საჩივარი არ დაგვიწერია, ჩვენ დავაკვირდებით პროცესს და ანგარიშებში ავსახავთ, მნიშვნელოვანია სახელობითი სიების გადამოწმება, თუ ვინ აირჩია ოლქმა. ოლქები ზოგიერთ შემთხვევაში ისეთ კომისიის წევრებს ირჩევს, რომლებსაც წინა არჩევნებზე თავიანთი უფლებები არაჯეროვნად აქვთ შესრულებული და სანქციები დაეკისრათ. ჩვენ ყველა ასეთ მონაცემებს გადავამოწმებთ. რაც შეეხება იმას, იყო თუ არა საუბნო კომისიის წევრების შერჩევა პოლიტიკურად ანგაჟირებული, ამის თქმა ზეპირად, მტკიცებულების გარეშე შეუძლებელია, თუმცა წლების განმავლობაში, არსებული პრაქტიკიდან გამომდინარე, ყველა ხელისუფლების პერიოდში არის მცდელობა, რომ გარკვეულწილად ჩაერიონ საუბნო საარჩევნო კომისიის წევრთა არჩევის პროცესში და შერჩევა გარკვეულწილად პოლიტიკურ ხასიათს ატარებს.“

საოლქო საარჩევნო კომისიებს საარჩევნო უბნებზე, ექვსი წევრის არჩევნის უფლება, დღეს 5 სექტემბერს ეწურება.აჭარის მთიან მუნიციპალიტეტებში საუბნო კომისიის ექვსი წევრი კვირას, 3 სექტემბერს აირჩიეს, ქობულეთსა და ხელვაჩაურში კი 4-ში.

საუბნო კომისიების წევრთა შერჩევა 4 სექტემბერს დაასრულა ბათუმის საოლქო კომისიამაც. ოლქის თავმჯდომარის მოადგილის, ვალერი ბერიძის თქმით, ბათუმში სულ 612 ვაკანსიაზე 886 განაცხადი იყო დარეგისტრირებული.

საუბნო კომისიებში დანარჩენ 7 წევრს კვალიფიციური პოლიტიკური პარტიები წარადგენენ.

ფოტო: არჩევნები-2016, „ბათუმელების“ არქივიდან

 

სტატია ქვეყნდება პროექტის „გაცნობიერებული არჩევანი – დემოკრატიის ფუნდამეტი“ ფარგლებში. ავტორის/ავტორების მიერ საინფორმაციო მასალაში გამოთქმული მოსაზრება შესაძლოა არ გამოხატავდეს ფონდ ”ღია საზოგადოება-საქართველოს” პოზიციას. შესაბამისად, ფონდი არ არის პასუხისმგებელი მასალის შინაარსზე.

სორისის ფონდი

ნეტგაზეთის მასალების სხვა გამოცემებში გადაბეჭდვის წესი
ავტორი