აჭარის მთავრობამ აჭარის ფინანსთა და ეკონომიკის სამინისტროს იმ გადაწყვეტილების გადახედვა დაავალა, რომლითაც სამინისტრომ რუსთაველის ქუჩაზე, ბარბარეს ეკლესიის მიმდებარედ არსებულ სკვერში კერძო კომპანიას 7 ათასი კვადრატული მეტრი მიწა ჩამოართვა. ტერიტორია კომპანია „აქთივ ბათუმს“ გარკვეული ვალდებულების აღების სანაცვლოდ 6 წლის წინ გადაეცა. სკვერის ამ ნაწილისა და განსახორციელებელი ინვესტიციის ბედი დღემდე გაურკვეველია.
„მაგ ტერიტორიის შემოღობვასთან, შენობის სართულიანობასთან და კოეფიციენტთან დაკავშირებით ბათუმის მერიასთან გვქონდა მიმოწერა თავის დროზე; მშენებლობის ნებართვის მიღების კუთხითაც იყო დაწყებული მუშაობა, თუმცა ამ დროისთვის სამშენებლო ნებართვა არ გვაქვს“, – განაცხადა „ბათუმელებთან“ „აქთივ ბათუმის“ მენეჯერმა მამუკა ზაქარაძემ.
მისივე თქმით, აჭარის ფინანსთა და ეკონომიკის სამინისტროსთან მიმდინარეობს მოლაპარაკებები, თუმცა კონკრეტულ დეტალებზე არ ისაუბრებს: „ამ ეტაპზე მთავარია გაირკვეს ტერიტორიის ბედი“.
ტერიტორია, რომელიც ბათუმის ცენტრში, რუსთაველის, დემეტრე თავდადებულისა და ნინოშვილის ქუჩებს შორის მდებარეობს, აჭარის ფინანსთა და ეკონომიკის სამინისტრომ აჭარის საკუთრებად 2015 წლის 5 თებერვალს ხელახლა დაარეგისტრირა. სამინისტრომ მანამდე „აქთივ ბათუმს“ ამ ტერიტორიასთან დაკავშირებით ვალდებულებები გაუუქმა [შესაბამისად, ტერიტორიაზე საკუთრების უფლებაც]. სამინისტრო კომპანიას ხელშეკრულებით გაწერილი ვადების დარღვევაში ედავებოდა. სწორედ ამ გადაწყვეტილების გადახედვა მოუწევს ამჯერად სამინისტროს.
აჭარის ფინანსთა და ეკონომიკის სამინისტროში „ბათუმელებს“ განუცხადეს, რომ „აქთივ ბათუმთან“ ამ დროისთვის რაიმე შეთანხმება მიღწეული არ არის: „ვადები აქვს დარღვეული, ვალდებულებები შეუსრულებელი იმ ნაკვეთზე, რომელიც საკუთრებაში ჰქონდა კომპანიას გადაცემული. დღეს ეს არის თავისუფალი მიწის ნაკვეთი. ადრე გავაუქმეთ ხელშეკრულება, მაგრამ აჭარის მთავრობაში გაასაჩივრა კომპანიამ და მთავრობამ დააბრუნა უკან… ამ ეტაპზე გადაწყვეტილება არ არის მიღებული“.
იმ დოკუმენტებში, რაც სამინისტროდან გადმოგვიგზავნეს, „აქთივ ბათუმთან“ დაკავშირებით აღნიშნულია: „მიმდინარეობს მიწის ნაკვეთის მონაცვლეობის პროცედურები“.
კომპანია „აქთივ ბათუმს“, რომელიც ბათუმში ყოფილ ფოსტის შენობასაც ფლობს, ზემოაღნიშნულ ტერიტორიაზე 40-სართულიანი სასტუმრო და გასართობი ცენტრი [მათ შორის კაზინო] უნდა აეშენებინა. კომპანია ვალდებული იყო ნასყიდობის ხელშეკრულების გაფორმებიდან [ანუ, 2010 წლის 30 მარტიდან] 24 თვის ვადაში მოეპოვებინა მშენებლობის ნებართვა; აღებული ვალდებულებების საბოლოოდ შესრულებისთვის კი ვადა კომპანიას 2017 წლის 30 მაისამდე ჰქონდა.
აჭარის მთავრობას აღნიშნული ნაკვეთი მაშინ 2 207 205 ლარად ჰქონდა შეფასებული. „აქთივ ბათუმს“ კი 500 ათას დოლარად გადასცეს. ამავე კომპანიას, პირდაპირი მიყიდვის წესით, 6 მილიონ აშშ დოლარად შეფასებული „ფოსტის შენობა“ მიყიდეს – 2,5 მილიონ დოლარად. ორივე პროექტის განხორციელებაში კი „აქთივ ბათუმს“ 30 მილიონზე მეტი დოლარი უნდა დაეხარჯა.
შპს „აქთივ ბათუმი“ იმ ხუთ პრობლემურ კერძო და იურიდიულ პირს შორისაა, რომლებთანაც აჭარის ფინანსთა და ეკონომიკის სამინისტროს ადმინისტრაციული წარმოება აქვს დაწყებული.
ამ ხუთეულში ასევე შედის:
ილია ბაღათურია, რომელსაც 2014 წლის 28 ივნისამდე ანგისაში გასართობი ცენტრი უნდა აემოქმედებინა [შენობა აშენებულია, თუმცა ბათუმის მერია ექსპლუატაციაში არ ღებულობს. „მერიამ მოგვწერა, რომ სამართლებრივი დავა მიმდინარეობს. ბაღათურია კი თვლის, რომ მერია უსაფუძვლოდ ამბობს უარს შენობის ექსპლუატაციაში მიღებაზე. ამ საკითხს რომ დაარეგულირებენ, შემდეგ გადავწყვეტთ – ჩავუთვლით თუ არა ვალდებულებას შესრულებულად“ – გვითხრეს ფინანსთა და ეკონომიკის სამინისტროში];
შპს „ეიერ-მერიდიანი“ – ამ კომპანიას კახაბრის დასახლებაში უნდა აემოქმედებინა სასტუმრო და სამორინე [სამინისტრო აცხადებს, რომ ბე-ს თანხა გადახდილი აქვს, თუმცა დარღვევები აქვს გარკვეულ ვალდებულებებში; პირობების შეუსრულებლობის გამო კი მიმდინარეობს ადმინისტრაციული წარმოება];
სს „გომარდული“, რომელმაც სამინისტროს ინფორმაციით, პირობები დაარღვია [უნდა აეშენებინა სასტუმრო სახლები, რესტორანი, მინი სტადიონი], თუმცა, სამინისტროში ამბობენ, რომ კომპანიას ამ ეტაპზე შემოსავლების სამსახურთან აქვს დაწყებული გარკვეული მოლაპარაკებები;
და ბოლოს, შპს „ბიოპოლუსი“, რომელმაც პირობები, ასევე სამინისტროს მონაცემებით, ვერ შეასრულა, მასზე გადაცემული ქონება კი დაყადაღებულია [სამინისტროში იმასაც აცხადებენ, რომ ხელშეკრულების გაუქმების შემთხვევაში ქონების უკან დაბრუნების პრობლემა შეიქმნება, ამიტომ გამოსავლის ძიებაში არიან].
