სარფიდან ჩოლოქამდე მონაკვეთში ზღვის წყლის ხარისხი საუკეთესოა სარფსა და კვარიათში, ხოლო შედარებით ცუდია ბათუმის ცენტრალური პლაჟისა და ბარცხანის დასახლების მიმდებარედ. „ზღვის წყლის ხარისხი ნორმებს შეესაბამება და ბოლო სამი წლის განმავლობაში იგი უმჯობესდება,“ – განაცხადეს გარემოს დაცვის სამმართველოში.
სარფი
აჭარის გარემოს დაცვისა და ბუნებრივი რესურსების სამმართველომ წელს სარფი-ჩოლოქის მონაკვეთზე ზღვის წყლის ხარისხობრივი მაჩვენებლების მონიტორინგი უკვე დაიწყო და პირველი ლაბორატორიული კვლევის შედეგიც ცნობილია.
ზღვის წყლის სინჯებს სამმართველო რვა წერტილში იღებს – სარფი, კვარიათი, ბათუმი [აკვაპარკთან და ცენტრალურ პლაჟთან], ბარცხანა, მწვანე კონცხი, ბობოყვათი, ქობულეთი [გამგეობის შენობის მოპირდაპირედ].
ზღვის წყლის მიკრობიოლოგიურ მაჩვენებელზე კვლევა ექვს კომპონენტს მოიცავს: ნაწლავის ჩხირის ჯგუფის ბაქტერიები [კოლი-ინდექსი], ლაქტოზა დადებითი ნაწლავის ჩხირები ლნჩ, კოლიფაგი [ეშერიხიას ფაგი], ფეკალური სტრეპტოკოკი, ოქროსფერი სტაფილოკოკი და პათოგენები [მათ შორის სალმონელა].
ზემოაღნიშნული მიკროორგანიზმების რაოდენობა წყლის 1 დმ/კუბში არ უნდა აღემატებოდეს: ნაწლავის ჩხირის შემთხვევაში – 10 ათასს, ლნჩ – 5 ათასს, კოლიფაგი – 100-ს, სტრეპტოკოკი და სტაფილოკოკი ნაკლები უნდა იყოს 1000-ზე, ხოლო სალმონელა წყალში საერთოდ არ უნდა არსებობდეს.
ბათუმის პლაჟი
„სალმონელა რომ აღმოჩნდეს წყალში, უნდა აიკრძალოს ზღვაში შესვლა. ამ მაჩვენებლებიდან მთავარი მაინც ნაწლავის ჩხირის ჯგუფის ბაქტერიებია, რომლებიც პირველი კვლევის შედეგით, ყველაზე მეტია ბარცხანაში, აკვაპარკთან და მწვანე კონცხთან, თუმცა, დასაშვებ ნორმაზე გაცილებით ნაკლებია. აღსანიშნავია ისიც, რომ ტემპერატურის მატებასთან ერთად უარესდება ზღვის წყლის ხარისხობრივი მაჩვენებელიც. მაგალითად, ბარცხანის პლაჟის მიმდებარედ დღეს ნაწლავის ჩხირის ბაქტერიების მაჩვენებელი არის 2400, აგვისტოში შესაძლოა ამ მაჩვენებელმა 7 000-ს მიაღწიოს, თუმცა ნორმით, 10 000-ს არ უნდა აღემატებოდეს [2013 წელს, მაგალითად, თითქმის ზღვარს მიუახლოვდა – 9 500 იყო]. ადამიანი რომ გადაყლაპავს ზღვის წყალს, გულის რევას, დიარეას ეს ბაქტერიები იწვევს,“ – ამბობს „ბათუმელებთა“ სამმართველოს გარემოს ინტეგრირებული მართვის განყოფილების უფროსი ნუგზარ პაპუნიძე.
„ბათუმელებმა“ სამმართველოდან 2013-2015 წლების კვლევის შედეგებიც გამოითხოვა. მოწოდებული მონაცემებით, აჭარის სანაპირო ზოლში ბოლო სამი წლის განმავლობაში ზღვის წყლის ხარისხი, ფაქტობრივად, უმნიშვნელოდაა შეცვლილი, თუმცა სამმართველოში ამბობენ, რომ ხარისხი უმჯობესდება.
„ადლიის გამწმენდი ნაგებობა რაც ამოქმედდა, საკანალიზაციო წყალი იწმინდება როგორც მექანიკურად, ასევე ბიოლოგიურად და შემდეგ ეშვება ზღვაში. ამან დადებითად იმოქმედა ზღვის წყლის ხარისხობრივ მაჩვენებელზე 2012-2013 წლებთან შედარებით, თუმცა ერთბაშად ეს არ აისახება და პერიოდულად გამოჩნდება,“ – ამბობს ნუგზარ პაპუნიძე.
ზღვის წყლის მთავარ დამაბინძურებლად რჩება სანაპირო ზოლის ობიექტები, მცურავი საშუალებები, ბათუმის ნაგავსაყარი და მდინარეები. ასევე ავტოსამრეცხაოები და ზედაპირული ჩამდინარე წყლებიც [სანიაღვრე არხები], რომლებშიც გასულ წელს ნორმაზე მეტი აღმოჩნდა საერთო აზოტი, ფოსფორი და სხვა მიკროელემენტები.
ბათუმი
სანიაღვრე არხები მიმდინარე სეზონზეც ღიად ჩაეშვება ზღვაში. ჟილინის არხზე გამწმენდი ნაგებობის მოწყობა გადაწყვეტილია, თუმცა მხოლოდ კონცეპტუალური პროექტი არსებობს; ნინოშვილისა და ჯავახიშვილის ქუჩების სანიაღვრე არხებიდან კი წყალი ერთ რეზერვუარში შეიკრიბება, დაილექება, ნალექი გადაიქაჩება საკანალიზაციო ქსელში, დარჩენილი წყალი გადავა მეორე რეზერვუარში, სადაც კიდევ გაიფილტრება და შემდეგ ჩაეშვება ზღვაში, დაახლოებით 200 მეტრის დაშორებით ნაპირიდან. ეს გამწმენდი/სატუმბი სადგური 2017 წელში დამონტაჟდება მიწის ქვეშ, ბულვარში, ე.წ. ჩინურ რესტორანთან.
ნინოშვილის ქუჩის არხის მეორე მხარე ღიად ჩადის ზღვაში იახტკლუბთან; ასევე სანიაღვრე არხი ჩადის ზღვაში ჭავჭავაძის ქუჩის დასაწყისში, შავშეთის ქუჩიდან შემომავალი სანიაღვრე არხი კი, ზღვას პორტში უერთდება.
რაც შეეხება მდინარეებს – ჭოროხი, მეჯინისწყალი, ბარცხანა და ყოროლისწყალი ასევე ღიად უერთდება ზღვას. ჭოროხთან არსებულ ნაგავსაყარს თუ გამოვრიცხავთ, ყველაზე პრობლემურია მდინარე ბარცხანა, ასევე ყოროლისწყალიც, რომლებშიც გოროდოკი-ბარცხანა-თამარის დასახლებებიდან ნახევრად გაუფილტრავი საკანალიზაციო წყალი ჩაედინება, შესაბამისად ფეკალიები ხვდება ზღვაში. ამ დასახლებებში საკანალიზაციო ქსელის მოწყობა დაწყებულია და ეს უბნები ცენტრალურ ქსელში 2017 წლის ბოლოს ჩაერთვება.
ბათუმის მერის მრჩევლის, ჯაბა ტუღუშის თქმით, დაგეგმილია მახინჯაურის ზღვისპირა ზოლში კანალიზაციის სისტემის მოწყობა მობილური გამწმენდი ნაგებობით [ანუ ეს ქსელი ცენტრალურ ქსელში არ ჩაირთვება]. ასეთი მობილური გამწმენდი ნაგებობის მშენებლობა უკვე დაწყებულია ჩაქვში. 2019 წლამდე თამარის დასახლებიდან მდინარე მეჯინისწყლამდე არსებულ ტერიტორიაზე არსებული საკანალიზაციო ქსელი მთლიანად მიერთებული იქნება ადლიის გამწმენდ ნაგებობაზე. „რაც შეეხება უშუალოდ ადლიას და ხელვაჩაურის დარჩენილ შემოერთებულ ტერიტორიაზე საკანალიზაციო ქსელის მოწყობას, პარალელურად დაიწყება ამ ადგილების ტექნიკურ-ეკონომიკური კვლევა და ფინანსების მოძიება. სამუშაოები პრიორიტეტების მიხედვით შესრულდება,“ – ამბობს ჯაბა ტუღუში.
გარემოს დაცვის სამმართველო ზღვის წყლის ხარისხის შემოწმებას პირველ ნოემბრამდე გააგრძელებს: „მიკრობიოლოგიურად გამოკვლეული იქნება ზღვის წყლის 150 სინჯი… სინჯებს შეარჩევენ მოსახლეობისა და დამსვენებელთა აქტიური დასვენების ადგილების მიხედვით. ზღვის წყლის მონიტორინგი საბანაო სეზონზე [მაისში, ივნისში, ივლისში, აგვისტოში და სექტემბერში] თვეში სამჯერ განხორციელდება, დანარჩენ თვეებში კი ორ-ორი გასვლაა დაგეგმილი. კვლევას ახორციელებს სსიპ ლაბორატორიული კვლევითი ცენტრი~.
სამმართველო ბარცხანის მიმდებარე ზოლში ბანაობის რეკომენდაციას, მიუხედავად იმისა, რომ აქ წყლის ხარისხი ნორმაშია, არ იძლევა. მდგომარეობა ამ მონაკვეთში საკანალიზაციო ქსელის მოწესრიგების შემდეგ გამოსწორდება.
